Elbasani, pjesëmarrës në kupën “Adem Jashari”

Skuadra e Milanos, edhe zyrtarisht ka konfirmuar pjesëmarrje në turneun tradicional “Adem Jashari” që zhvillohet në Kosovë, organizuar nga KF Drenica dhe mbështetur nga Federata e Futbollit të Kosovës. Këtë lajm e konfirmoi edhe drejtori i Milanos, Bajrush Veliu, i cili theksoi se nga skuadrat e Maqedonisë do të marrë pjesë vetëm Milano. “Nëpërmjet faksit të cilin ia dërguam FFK-së, konfirmuam pjesëmarrjen tonë në turneun “Adem Jashari”. Për ekipin tonë kjo është hera e dytë që do të marrim pjesë në këtë aktivitet, që njëherësh zhvillohet në kujtim të heroit legjendar, Adem Jashari” pohon Veliu, i cili shton se ende nuk e din se me çfarë formacioni do të paraqiten.“Nuk e di se a do të paraqitet komplet formacioni më i mirë ose jo, pasi për këtë vendos vetëm trajneri, Gjore Jovanovski. Mirëpo, një gjë është e sigurt, se ata që do të fitojnë rastin për të luajtur, do të japim maksimumin që ekipi i Milanos të prezantohet sa më mirë para publikut kosovar”, deklaroi Bajrush Veliu. Nga ana tjetër, sekretari i KF Drenica, Zejn Rushiti, siguroi se pas skuadrës së Milanos në turneun “Adem Jashari” pjesëmarrjen e tyre e kanë paralajmërua edhe KF Prishtina, KF Elbasani nga Shqipëria dhe ekipi suedez i Ligës së dytë, IKE Drage. “Deri më tani vetëm skuadra e Milanos ka konfirmuar pjesëmarrjen, ndërsa nëpërmjet një përfaqësuesi tonë që e kemi në Suedi mësuam se edhe ekipi suedez IKE Drage ka shprehur dëshirën të marrë pjesë në këtë garë. Ndërkohë, dua të them se KF Prishtina si fituese e Kupës së Kosovës është e obliguar të marrë pjesë në këtë turne, ndërsa në kontakte të vazhdueshme jemi edhe me drejtuesit e skuadrës nga Shqipëria, Elbasanin”, deklaroi Rushiti. Turneu “Adem Jashari” do të zhvillohet më 3 dhe 4 mars në Drenicë.

G.Sot

Eshte skuader shqiptare ne maqedoni, nga Kumanova, momentalisht eshte ne vendin e dyte ne klasifikimin ne ligen maqedonase..