Të rinjtë, koncert madhështor në Tiranë për ftesën në NATO

Atmosferë festive në koncertin e madh, Shqipëria në NATO, të organizuar nga Forumi Rinor Eurodemokratik. Pallati i Kongreseve ishte mbushur si asnjëherë tjetër nga të rinjtë demokratë, por kishte dhe një numër të madh studentësh. Salla ishte e tejmbushur me flamuj të Aleancës së Atlantikut të Veriut, të SHBA-së, BE-së dhe një numër i konsiderueshëm flamuj shqiptarë.



Ndërsa, shumica e të rinjve në platenë e sipërme rrinte në këmbë, sepse ajo ishte mbushur mbi kapacitetin e saj. Sipas menaxherëve të Pallatit të Kongreseve, numri i të pranishmëve ishte dy herë më i madh se sa mban salla e Pallatit të Kongreseve normalisht. Të rinjtë kishin mbipopulluar sallën, prej orës 17:00, ndërkohë që koncerti fillonte në orën 18:30. Rreth 30 minuta para se të fillonte koncerti, një DJ luante muzikë të lehtë dhe ritmike, duke e bërë të gjithë publikun të shpërthejë. Rreth orës 18:05 minuta salla shpërtheu në ovacione, fishkëllima njëkohësisht, brohoritje "Shqipëria në NATO" dhe thirrje në emrin e kryeministrit, Berisha. Publiku filloi të thërriste kreun e ekzekutivit, duke e përshëndetur, si arkitektin e reformave që mundësuan marrjen e ftesës nga Shqipëria për t'u anëtarësuar në Aleancën më të madhe të lirisë. Pas brohoritjeve të ndryshme, të pranishmëve në sallë për rreth 10 minuta, më pas filloi dhe koncerti, i cili u prezantua nga spikerja e njohur Evis Mula. Ra në sy veshja sportive e kryeministrit, i cili me performancën e tij i afrohej në moshë të rinjve të pranishëm. Në krah të kryeministrit Berisha ishin ulur kryetarja e Parlamentit Jozefina Topalli, kreu i Grupit parlamentar Demokrat, Astrit Patozi, ministri i Transporteve, Sokol Olldashi, si dhe shumë drejtues forumesh të Partisë Demokratike. Këngëtarja e parë që u ngjit në skenë ishte Çiljeta, e cila para se të këndojë, falenderoi kryeministrin Berisha që mundësoi arritje të mëdha ndërkombëtare të Shqipërisë, duke iu afruar sa më afër strukturave Euro-Atlantike. Më pas, në skenë u ngjit këngëtarja energjike Julka, e cila ftoi publikun për të duartrokitur me rastin e marrjes së ftesës për në NATO. Pallati Kongreseve mori të tjera ngjyra kur në skenë u ngjit këngëtarja e mirënjohur Aurela Gaçe, e cila është dhe fituese e "Këngës Magjike" këtë edicion. Pas përfundimit të këngëve të saj, ajo ftoi publikun të duartrokisnin kryeministrin Berisha, si dhe i bëri dhe një urim personal me dy vargje për kreun të ekzekutivit. Salla e tejmbushur e Pallatit të Kongreseve shpërtheu, kur prezantuesja ftoi për një fjalim përshëndetës për të rinjtë, kreun e qeverisë. Të gjithë të rinjtë u ngritën në këmbë dhe e shoqëruan kryeministrin me ovacione që të kujtonin ndeshjet e kombëtares, kur merrte rezultat pozitiv. Gjatë rrugës për në skenë, kreu i mazhorancës takoi me mijëra të rinj, të cilët po shtyheshin për t'i dhënë dorën kryeministrit. Me ngjitjen në skenë të tij, disa fishekzjarre me shirita pushtuan skenën. Ndërkohë, që nga thirrjet e shumta "NATO, NATO, Berisha, Berisha", kreu i qeverisë nuk arrinte dot të fliste. Gjatë fjalës së tij, kryeministri u rrethua nga disa të rinj me flamuj të NATO-s dhe shqiptarë. Pas çdo fjalie të tij, salla shpërthente në ovacione, dhe falenderime për kryeministrin. Pasi mbaroi fjalën kryeministri, skena u ndez nga disa fishekzjarrë, të cilat i dhanë një ndriçim shumë të madh skenës. Më pas, kryeministri në shenjë falenderimi zbriti dhe takoi me shtrëngime duarsh tërë rreshtin e parë si dhe anësoret që të çonin në vendin ku ishte ulur më parë. Më pas, koncerti vazhdoi me të tjerë këngëtarë siç ishte, Eranda Libohova. Produkt 28 pasoi më pas skenën e koncertit të madh me këngët e tyre rinore. Me ikjen nga skena dhe grupi që përbëhet nga tre të rinj, përshëndeti marrjen e ftesës për t'u anëtarësuar në NATO. Më pas, në skenë u ngjit Besa, e cila këndoi këngët e saj më të bukura. Besa i uroi të rinjtë që të shijojnë lirinë si të rinjtë e shteteve anëtare të NATO-s. Blero dhe Tingulli 3, pushtuan më pas skenën, e cila në këtë koncert madhështor ishte gjithnjë e më shumë shpërthyese. Afër mbylljes së këtij koncerti festiv, kënduan dhe dy këngëtaret Soni dhe Bleona Qereti, të cilat me një zë përshëndetën afrimin e Shqipërisë me strukturat Euro-Atlantike. Në fund të koncertit këndoi dhe prezantuesja e tij, Evis Mula. Sipas saj, kreu i ekzekutivit i dha një atmosferë tepër spektakolare, koncertit të madh festiv, që u organizua me rastin e marrjes së ftesës për në NATO. Më pas të rinjtë me flamujt e NATO-s shijuan dhe pak minuta muzikë të ritmeve të fundit, nga DJ profesionist. Nga mbipopullimi me të rinj nga të gjitha moshat, salla tregoi edhe një herë se të rinjtë shqiptarë kanë etje për të qenë si bashkëmoshatarët e tyre europianë. Kjo është gjithnjë e më afër, për këtë kryeministri Berisha i premtoi atyre se do të punoj çdo ditë, pa u lodhur deri sa ëndrra e të rinjve të realizohet.

Elis KUÇI