Shifrat e botuara në raportin e Bordit Ndërkombëtar i Kontrollit të Drogës. Një ndër 300 shqiptarë është i droguar pasi, në total janë rreth 30 mijë persona, gati të të gjitha moshave dhe të dy sekseve, të cilët janë përdorues të drogave sintetike, lëndëve, bimëve apo bimëve narkotike. Shifra alarmante nuk është publikuar nga burime jozyrtare, por është deklaruar nga vetë Ministria e Shëndetësisë e vendit tonë, si dhe është publikuar nga Bordi Ndërkombëtar i Kontrollit të Drogës (INCB - organizatë ndërkombëtare), në raportin e saj vjetor për vitin e kaluar. “Sipas Ministrisë së Shëndetësisë, në Shqipëri ky vend numëronte në janar të 2006-s rreth 30 000 toksikomanë, përkundrejt 4 000 personave të identifikuar si narkomanë në vitin 1995, dhe 20 mijë personave të identifikuar si toksikomanë në vitin 1998.” Kështu shkruhet, e zezë mbi të bardhë, në raportin e vitit të kaluar për situatën e drogmenëve në vendin tonë. Pa dyshim, që numri më i madh i përdoruesve të lëndëve të ndryshme narkotike në vendin tonë është në Tiranë, pasi kryeqyteti duket se ka një “treg” më të begatë, sipas specialistëve të antidrogës, ku mund të gjesh çfarë të duash. Ndërkohë që, një vit më parë vendi ynë numëronte rreth 30 mijë përdorues drogash të ndryshme, pra rreth 10 mijë persona më shumë sesa 8 vite më parë. Po sipas të njëjtit raport, të botuar pak ditë më parë (dhe që mund të gjendet në sitin
www.incb.org), thuhet se 4 000 prej këtyre personave, të identifikuar si përdorues lëndësh dhe bimësh narkotike, kanë nevojë për një trajtim special, të cilin vendi i tyre nuk mundet që t’ia ofrojë.
