Politika shqiptare, akomodimi në godinat ku “ngjizen” idetë dhe ulje-ngritjet e pushtetit.

PS, në ish-godinën e Komitetit të PPSH për Tiranën, PD tek
ish-Ministria Komunale, PSD në godinën e marrëdhënieve kulturore me partitë motra komuniste, të tjerat me qira apo në godina të reja.

Partia Demokratike

Është partia më e madhe në pushtet
dhe kjo seli ndodhet në rrugën “Punëtorët
e Rilindjes”, numër 120. Partia
Demokratike është transferuar në
këto zyra në vitin 1994. Këto zyra nuk
janë pronë e partisë, por është pronë
e shtetit, në bazë të ligjit për partitë
politike, kjo parti financohet nga shteti
dhe i ofrohen mjedise për selitë e
saj në rrethe. Përpara transferimit të
selisë së Partisë Demokratike, këto
kanë qenë ambiente të ish-Ministrisë
së Komunales (të ashtuquajtur në
atë kohë). Kjo godinë është rikonstruktuar
me fonde të kësaj partie për
përmirësimin e kushteve dhe zgjerimin
e hapësirës së saj. Kjo godinë,
nga dykatëshe që ka qenë ekzistuese,
tashmë është trekatëshe. Ambienti
i kësaj selie është rreth 1000
metra katrorë dhe ka rreth 30 zyra.
Gjithashtu, në këto ambiente disponohet
sallë konferencash, si dhe
një arkiv të kësaj partie.

Partia Socialiste

Është partia më e madhe në opozitë
dhe kjo seli ndodhet te sheshi “Austria”,
numër 31. Partia Socialiste që nga
krijimi e deri më tani ka përdorur këto
zyra si selinë e saj, janë në përdorim të
kësaj partie nga viti 1991. Këto zyra janë
dhënë nga shteti, nga Parlamenti i parë
pluralist, ku sipas ligjit mbi partitë politike
duhet të jepen ambiente për partitë
që përfaqësohen në parlament me
deputetë . Përpara vendosjes së Partisë
Socialiste në këtë godinë, kanë
qenë ambientet e Komitetit të Partisë
së Punës Shqipërisë, për qytetin e Tiranës.
Kjo godinë është pesëkatëshe
dhe ka një stil të veçantë të ndërtimit të
ambienteve, ku vërehet stili amerikan,
pasi dhomat janë të hapura dhe pa
mure ndarëse. Ky stil është edhe në
zyrën e kryetarit të kësaj partie, ku në
një hapësirë prej katër muresh punojnë
12 punonjës. Kjo godinë ka rreth 20
dhoma, sallë konferencash, si dhe një
arkiv të kësaj partie.

Partia Lëvizja Socialiste për Integrim

Është partia e dytë më e madhe në
opozitë dhe kjo seli ndodhet te rruga
“Sami Frashëri”, numër 20/10. Partia
Lëvizja Socialiste për Integrim është
transferuar në këto zyra në dhjetor të
vitit 2006. Më parë në këtë godinë ka
qenë selia e LSI-së për Tiranën dhe
gjithashtu në këtë godinë ushtronin
aktivitete të tyre dhe ndërmarrje private.
Qëllimi i kësaj shpërnguljeje është afrimi
me institucionet, duke pasur parasysh
pozicionin e saj të favorshëm. Por
me shpërnguljen e LSI-së është marrë
përsipër nga kjo parti e gjithë godina,
duke e rikonstruktuar dhe duke ofruar
kushte shumë të favorshme për
aktivitetin e tyre politik. E veçantë në
këtë ndërtesë është stili i përdorur në
ndërtimin e zyrave, ai amerikan. Kjo
godinë është katërkatëshe dhe në të
gjitha katet është përdorur ky stil. Në
ambientet e LSI-së ka një sallë konferencash,
si dhe disponojnë arkiv të
kësaj partie.

Partia Demokristiane

Është parti pjesëmarrëse në koalicionin
e mazhorancës dhe kjo parti
është e përfaqësuar në ekzekutiv.
Partia Demokristiane ndodhet në
rrugën “Abdyl Toptani”, ish-hotel Drini.
Këto zyra janë dhënë nga shteti,
në bazë të ligjit për partitë politike, ku
partitë që janë të përfaqësuar në
parlament me deputetë i japin në
dispozicion ambiente për selitë e tyre
politike. Kjo parti ka rreth një vit që
është transferuar në këto ambiente,
për të qenë më afër institucioneve.
Përpara transferimit të Partisë
Demokristiane në këtë godinë, kanë
qenë zyrat administratës së antikontrabandës.
Të gjithë ambientet ekzistuese
të kësaj godine, që janë në
përdorim të PDK-së, janë rikonstruktuar
plotësisht me të ardhurat e vetë
partisë. Ky ambient ka një sipërfaqe
rreth 300 metra katrorë dhe brenda
saj ka tetë dhoma, një sallë konferencash
dhe arkiv të kësaj partie.

Partia Socialdemokrate

Është parti pjesëmarrëse në koalicionin
e opozitës. Partia Socialdemokrate
ndodhet në rrugën “Asim
Vokshi”, numër 26. Këto zyra janë
dhënë nga shteti me vendim të
Këshillit të Ministrave, ku këto ambiente
i kalojnë kësaj partie në administrim.
Kjo parti që nga fillimi i
saj është vendosur në këtë ambiente.
Partia Socialdemokrate është
vendosur në këtë ambiente në
gusht të vitit 1991. Përpara transferimit
të Partisë Socialdemokrate
në këto zyra, ka qenë godina e Komitetit
të Marrëdhënieve Kulturore
me botën e jashtme. Por, me sa
duket, nga kjo parti, ndryshe nga
partitë e tjera, nuk është vënë
shumë dorë në rikonstruktimin dhe
mirëmbajtjen e zyrave. Në këtë godinë
ekzistojnë nëntë dhoma. Gjithashtu
brenda kësaj godine ekziston
edhe një sallë konferencash si dhe
një arkiv i kësaj partie.

Partia Republikane

Është parti pjesëmarrëse në koalicionin
e mazhorancës dhe kjo parti është
e përfaqësuar në ekzekutiv. Partia
Republikane ndodhet në rrugën “Ismail
Qemali”, pallati “Fratari”, shkalla
3-të. Këto ambiente janë marrë me
qira nga kjo parti, për t’iu larguar ishzyrave
të tyre që nga viti 1994 te “doganat”,
dhe për të ardhur në këto ambiente
për të qenë më afër institucioneve.
Në këtë godinë ky institucion ka
shkuar në nëntor të 2005. Përpara
transferimit në këtë godinë kanë qenë
ambiente zyrash private dhe kanë një
sipërfaqe 180 metra katrorë . Në këtë
hapësirë ndodhen tetë dhoma, ku
përfshihen dhe një sallë konferencash
si dhe një dhomë për arkivin.
Kjo parti përfaqësohet në Parlament
dhe në bazë të ligjit dhe vendimit të
Këshillit të Ministrave të vitit 2006, ka
përfituar ambiente tek ish-hotel “Drini”
dhe tashmë janë në rikonstruksion
me fondet e saj.

Partia Lëvizja e Legalitetit

Është një parti e pa përfaqësuar në
Parlament me deputetë. Partia
Lëvizja e Legalitetit ndodhet në bulevardin
“Zogu i I”, shkalla 2-të, tek
ish-klinika dentare. Këto ambiente
janë me qira nga kjo parti, pasi nuk
përfaqësohet në Parlament me deputetë,
që e detyron atë të paguajë
për ambientet që ka marrë në administrim
nga shteti. Por, gjithçka
është kundrejt një qiraje minimale,
që paguhet me fondet e vetë partisë.
Përpara vendosjes së kësaj
partie në këtë godinë, kanë qenë
zyra të minibashkisë. Ky institucion
është transferuar në këtë ambient
në janar të vitit 2005. Ka një sipërfaqe
rreth 65 metra katrorë . Në këtë
ambient ka 4 dhoma, ku përfshihet
dhe salla e konferencave dhe arkiva
e partisë.

Partia Aleanca Demokratike

Është parti pjesëmarrëse në koalicionin
e opozitës. Partia Aleanca
Demokratike ndodhet në rrugën
“Murat Toptani”, numër 10. Këto
ambiente kanë kaluar në administrim
të kësaj partie në bazë të
ligjit për partitë politike dhe vendimit
të Këshillit të Ministrave, si
parti që përfaqësohet në Parlament
me deputet. Në këtë godinë,
ky institucion është vendosur në
vitin 1997. Përpara vendosjes në
këto zyra, kanë qenë ambiente të
Drejtorisë Arsimore në Tiranë. Ky
ambient ka një sipërfaqe prej 250
metra katrorë . Në këto ambiente
ndodhen shtatë dhoma, ku përfshihen
dhe sallë konferencash, sallë
mbledhjeje dhe një arkiv të partisë.
Kjo parti herë pas herë ka rikonstruktuar
dhe ka mirëmbajtur ambientet
e këtyre zyrave, duke u përpjekur
të ketë dhe një imazh në
sytë e publikut.

Partia Bashkimit të Drejtave të Njeriut

Është parti pjesëmarrëse në koalicionin
e mazhorancës. Partia Bashkimit
të Drejtave të Njeriut ndodhet në bulevardin
“Bajram Curri”, numër 32, në
krah të Ministrisë së Shëndetësisë.
Këto ambiente janë pronë e shtetit,
por i kanë kaluar në administrim kësaj
partie në bazë të ligjit për partitë politike
dhe vendimit të Këshillit të Ministrave
si parti e përfaqësuar në parlament
me deputetë . Partia Bashkimit
të Drejtave të Njeriut është vendosur
në këtë godinë në vitin 1999. Përpara
se ky institucion të merrte në administrim
këtë godinë, kanë qenë ambiente
të ndërmarrjes së import-eksport
me jashtë dhe ka qenë në varësi të
Ministrisë së Ekonomisë. Sipërfaqja
e kësaj godine është rreth 250 metra
katrorë , përbëhet nga tetë dhoma dhe
nuk disponon sallë konferencash.
Arkiva e kësaj partie nuk ekziston, pasi
është shkatërruar pas një djegieje të
godinës në vitin 2000.

Partia Demokracia Sociale

Është parti pjesëmarrëse në koalicionin
e opozitës. Partia Demokracia
Sociale ndodhet në bulevardin
“Zogu i I”, ish-klinika dentare, shkalla
3-të. Këto ambiente janë dhënë
nga shteti, në bazë të ligjit dhe vendimit
të Këshillit të Ministrave për
partitë politike. Kjo parti është vendosur
në këto ambiente në vitin 2003,
ku, me sa duket, edhe zhvendosja e
selisë së tyre është bërë për qëndrimin
sa më pranë të institucioneve.
Përpara vendosjes së Partisë
Demokracia Sociale në këto zyra,
kanë qenë ambiente klinike dentare
të shtetit. Ky ambient ka një sipërfaqe
140 metra katrorë . Brenda kësaj
hapësire ndodhen pesë dhoma,
sallë konference dhe një arkiv të këtij
institucioni. Kjo parti shpeshherë me
fondet e saj rikostrukton ambientet
dhe ndihmon në mirëmbajtjen e tyre,
duke i kushtuar kësaj të fundit një
vëmendje të veçantë.

Përgatiti: Denis Dedej Koha Jone