Krerët e së djathtës janë përfshirë dje në akuza të ndërsjella për kandidim të bashkëpunëtorëve të ish-Sigurimit të Shtetit. Topalli: "Është Ndoka". Meksi: "Është Topalli"

TIRANE-Krerët e së djathtës janë përfshirë dje në akuza të ndërsjella për kandidim të bashkëpunëtorëve të ish-Sigurimit të Shtetit. Drejtuesi i “Polit të Lirisë”, Aleksandër Meksi akuzoi krerët e Partisë Demokratike si ish-sigurimsa, ndërsa Jozefina Topalli deklaroi se ish-sigurimsa gjenden në drejtim të Partisë Demokristiane. E pyetur për qëndrimin e Meksit, nënkryetarja e PD-së deklaroi se, nëse ka sigurimsa që kandidojnë, përgjegjësia bie mbi mosdekretimin e ligjit për pastrimin e figurës së zyrtarëve, apo siç njihet ndryshe ligji i “Dosjeve”.
“Presidenti i Republikës nuk e firmosi asnjëherë atë ligj. Unë po punoj në Komisionin e Venencias për ta bërë të mundur. Nuk jam në gjendje të kthej përgjigje nëse janë skanuar apo jo listat”, - deklaroi nënkryetarja e PD-së, Topalli gjatë një emisioni televiziv. Ajo shtoi se Partia Demokristiane ka kandiduar njerëz që kanë qenë bashkëpunëtorë të ish-Sigurimit të Shtetit.
Nga ana tjetër, kryetari i PDK-së, Nard Ndoka, deklaroi se do ta padisë për shpifje nënkryetaren e PD-së.
“Shpifjet e Topallit do t’i çojmë në Prokurori. Që nesër do të jetë në Prokurori. Po ashtu, edhe për policinë, për prishjen e imazhit të Aleks Kekës. Fyerjet dhe shpifjet e Topallit janë të papranueshme”, - deklaroi Ndoka, gjatë një emisioni televiziv. Ai u shpreh se Jozefina Topalli është e padëshiruar nga vetë Berisha. Ndërsa, drejtuesi i “Polit të Lirisë”, Aleksandër Meksi e shtoi dozën e kritikave, duke deklaruar se sigurimsat janë në krye të listave të Partisë Demokratike.

(d.b/GazetaShqiptare/BalkanWeb)