ç'kërkojmë ne?

Natyrisht që mjetet që kërkojmë për ndihmat janë shumë të domosdoshme, sepse ne po kërkojmë vetëm ato me të cilat mund të kemi sukses për të ndihmuar.

1. Ne kërkojmë që këto paciente të përfshihen në ligjin për viktimat e luftës me ndonjë amendament të veçantë ose të ketë një ligj të veçantë për to, sepse ato nuk gëzojnë asnjë të drejtë dhe patjetër do të duhej të përfshihen në ligj.

2. Problem më vete është braktisja e viktimave nga burrat dhe obligimet që ata do të duhej të kishin për femrat dhe fëmijët e tyre. Ky problem është shumë më delikat kur llogaritet se 90 % e këtyre nënave që janë 14-79 nuk kanë pasur kurorë asnjëherë me burrat e tyre dhe ata sot nuk marrin kurrfarë përgjegjësie për dëbimin e tyre dhe të fëmijëve të tyre të përbashkët. Thjesht ata e dinë se nuk janë të kurorëzuar dhe dëbojnë gratë e tyre ose i braktisin, duke i lënë pa kurrfarë mbështetjeje.

3. Problem tjetër është që asnjëra nga femrat e dhunuara nuk hyn në trashëgiminë familjare dhe nga trashëgimia nuk përfitojnë asgjë as nëna dhe as fëmija. Kjo do të duhet të rregullohej në baza ligjore, sepse janë 111 fëmijë që baballarët i kanë dëbuar nga shtëpia me nënat e tyre dhe ata nuk gëzojnë asnjë të drejtë në trashëgimi.

4. Kërkojmë që këto viktima të gëzojnë të gjitha ndihmat sociale si dhe strehim, sepse 386 prej tyre së bashku me fëmijët e tyre i kemi strehuar në vendbanime të ndryshme, strehimore dhe banesa të përkohshme. Ndaj kërkojmë që edhe kjo çështje të zgjidhet nga institucionet përkatëse.

5. Ne bëjmë sigurimin e barnave për 1500 paciente, të cilat kanë nevojë për trajtim mjekësor dhe këtë nuk kanë mundësi ta bëjnë për arsye se do të identifikoheshin nga rrethi që janë të dhunuara. Do ta bëjmë këtë në mënyrë të fshehur, sikur po kontrollojmë të gjitha banoret e fshatrave dhe lagjeve, vetëm e vetëm që ato mos të mbesin jashtë kujdesit mjekësor. Andaj kërkojmë që sigurimin e barnave ta bëjë së paku 50 % Ministria e Shëndetësisë.

6. Ndërsa për 239 femra të keqtrajtuara seksualisht që janë në gjendje më të mirë shëndetësore dhe nuk kanë plagë ne pjesët e dukshme të trupit, kërkojmë përkrahje për punësim dhe, për ato më të reja, që të kenë mundësi të studiojnë me çmime të lira.

7. Pacientet tona kanë 3007 fëmijë dhe ata vazhdojnë të jetojnë në ankth. Ata kanë probleme shumë të mëdha, sepse u mungon siguria, janë pa baba, jetojnë me nënën e traumatizuar dhe në mungesë të gjërave të shumta dhe të domosdoshme për një jetësë normale dhe rritje normale. Shumë nga fëmijët kanë trauma për shkak të asaj që kanë përjetuar ose për shkak të traumave të nënës. Kërkojmë që këta fëmijë të kenë trajtim më të mirë, sepse fëmijët janë ardhmëria jonë.

8. Kemi 37 paciente me plagë të hapura në fytyrë, të cilat për 5 vite nuk kanë dalë asnjëherë jashtë. Ne duhet të kujdesemi që atyre t'u dalim për çdo lloj ndihmë, andaj kërkojmë që qeveria të na japë një fond të vogël, me të cilin do të mund të paguanim një infermiere, e cila do të kujdesej së paku për tetë orë në ditë për to dhe për fëmijët e tyre.

9. Kërkojmë një fond të vogël nga qeveria e Kosovës, fond me të cilin do të blinim për jetimët pajisjet shkollore si dhe veshmbathjet e domosdoshme, sepse edhe këtë vit, si vitin e kaluar, ne jemi të detyruar të dalim dhe të kërkojmë veshmbathje nga qytetarët, që të mos i lejojmë ata fëmijë të mërdhijnë nga mungesa e veshmbathjeve të domosdoshme.

10. Gjithashtu kërkojmë nga qeveria që të ndajë një fond të vogël, me të cilin do të paguanim një shujtë (drekë) në ditë për ne, pasi punojmë vullnetarisht. Ajo do të ishte i vetmi përfitim për ne dhe nga ai fond do të mund të paguanim karburantin gjatë aktivitetit tonë humanitar.

11. Po ashtu, pasi nuk kemi arritur të sigurojmë dru për ngrohje, do të kërkonim një fond të vogël për jorganë dhe qebe për viktimat, sepse atyre u mungojnë ato, ndërsa ne nuk jemi në gjendje t'ua sigurojmë.

12. Kërkojmë ndikimin tuaj dhe të Qeverisë tek administrata tatimore që të mos kërkojë që çdo gjë ta verifikojmë në vendin e ngjarjes, sepse puna jonë është konfidenciale dhe ne nuk mund t'i paraqesim për dëshmi gjësendet që kemi dërguar tek pacientet, sepse do të zbulohet vendstrehimi i pacienteve dhe mund të kuptohet edhe identiteti i tyre.