"Operatorët mobilë kanë operuar me çmime më të lira"

Sipas raportit vjetor të Entit
Rregullator të Telekomunikacioneve,
operatorët AMC dhe
"Vodafone Albania" kanë zbatuar
ulje të tarifave gjatë vitit të shkuar.
Por, kjo ulje e shpjeguar me tone
shpresëdhënëse në raport, është
kompensuar nga ana e kompanive
me rritje të ndjeshme të
fitimeve për 2006-ën.
Raporti i referohet
INSTAT-it, sipas të
cilit, indeksi i komunikimeve
të telefonisë
celulare për muajin
tetor 2006 shënoi një
ulje prej 14,9 për
qind, krahasuar me
muajin shtator 2006.
Indeksi i INSTAT për
komunikimet e telefonisë
së lëvizshme
mat tarifat e thirrjeve
telefonike celulare
dhe SMS-të e dy operatorëve
AMC e "Vodafone Albania"
për përdoruesit me parapagim.
Por, nga ana tjetër, sipas
vlerësimeve të kreut të Entit Rregullator
të Telekomunikacioneve,
Hydajet Kopani, të ardhurat e dy
kompanive gjatë vitit 2006 janë
rritur ndjeshëm. Duke mos pasur
një bilanc të plotë vjetor të të ardhurave
të dy kompanive për vitin
2006, duke qenë se rezultatet finale
nuk janë publikuar ende, raporti
i ERT-së u referohet shifrave
të vitit 2005. Gjatë këtij viti, operatorët
celularë patën rritjen më të
madhe, krahasuar me rritjen e të
ardhurave të "Albtelekom"-it, e
cila ishte vetëm 9%. Ndërsa AMC
dhe "Vodafone Albania"
patën një
rritje mesatare në
të ardhura që e
kalon normën 13
për qind. Sipas
raportit të ERT-së,
konsumi i thirrjeve
të gjeneruara nga
përdoruesit e linjave
celulare, me
kontratë dhe parapagim,
rezultoi
mesatarisht në
nivelin e 20-25
minuta në muaj,
gjatë gjashtëmuajorit të parë të
2006-ës. Kjo prirje ka mbetur e
pandryshuar gjatë tri viteve të fundit.
Gjithashtu gjatë gjashtëmujorit
të parë të 2006-ës është vërejtur
një rritje e ndjeshme e konsumit
të mesazheve SMS nga
përdoruesit e telefonisë së
lëvizshme.