Të ardhurat për vitin 2006 ishin rreth 20,3 për qind më shumë se më 2005-n    

Të ardhurat neto të kompanisë të telefonisë së lëvizshme AMC kanë arritur në 49,9 milionë euro në vitin 2006. Kompania ka raportuar rritje të të ardhurave për vitin 2006 rreth 20,3% më shumë se një vit më parë. Fitimet para interesave, taksave, amortizimit për vitin e fundit arritën në 91 milionë euro. “Të ardhurat bruto për 2006-n ishin 9,7% më shumë se një vit më parë, duke arritur në 151 milionë euro,” tha Cosmote në raportin përfundimtar të grupit, ku përfshihet edhe dega në Shqipëri AMC. “Gjatë vitit 2006 kompania ka kontribuar me rreth 6% në të ardhurat e grupit”, thuhet në deklaratë. Grupi në total ka arritur rreth 2,38 miliardë euro, ndërkohë që EBITDA qëndroi në 876,2 milionë euro deri në fund të dhjetorit. Operatori telefonik AMC arriti të ketë 990 279 abonentë, prej të cilëve 89 314 u shtuan në tremujorin e katërt. AMC është operatori i parë shqiptar. Cosmote bleu 85% të aksioneve në vitin 2000 për 85,6 milionë dollarë, ndërkohë që 15% e aksioneve vazhdon të jetë pronë e shqiptarëve. Ndërkaq, pritet që së shpejti të hyjë në treg edhe operatori Eagle Mobile, i cili është pronë e Albtelecom.

Shaqir Dabulla