Ansambli i Këngëve dhe Valleve çel sezonin e ri

Ansambli Kombëtar i Këngëve dhe Valleve, çeli mbrëmë sezonin e ri artistik me një mbrëmje "gala", të titulluar "Gjerdani i artë 2". Në repertor, bënin pjesë perla të folklorit shqiptar si në këngë, ashtu edhe në valle, të interpretuar nga emra të njohur të skenës së këtij ansambli, si nga valltari i njohur Rexhep Çeliku, nga artistët e njohur, Besa Xhelili, Aleksandër Rrapi, Bardhyl Xhafka, si dhe nga këngëtarja e mirënjohur e këtij ansambli, Irini Qirjako, dhe nga këngëtarja e jareve shkodrane Sabahet Vishnja. Për herë të parë u interpretua dhe një kolazh i ri vokal, me këngë nga treva të ndryshme të vendit. Sezoni i ri i Ansamblit të Këngëve dhe Valleve Popullore do të vijojë me një koncert me këngë korçare, titulluar "Dëbora zbardhi malet", me një koncert me krijime çame, me një koncert me krijimtari nga krahina e Dibrës, si dhe me dy koncerte recitale të këngëtareve Sabahet Vishja dhe Irini Qirjako.

G.Shqip