Tiranë, Fier, Vlorë, Shkodër: 847 kërkesa për ndarje në 5 muaj. Shkaqet, dhuna, problemet ekonomike dhe pakënaqësitë seksuale

Edhe pse 2010-a është një vit çift dhe sipas besëtytnive duhet të jetë një vit i mbarë për marrëdhëniet në çift, nuk rezulton aspak i tillë për shqiptarët. Vetëm në 5-mujorin e parë të këtij viti, në 4 prej qyteteve kryesore të Shqipërisë, Tiranë, Fier, Vlorë dhe Shkodër janë regjistruar plotë 847 kërkesa për divorc, ku vendi i parë mbahet nga Tirana me 442 kërkesa për divorc, i ndjekur nga Fieri me 160 dhe më pas vijnë Vlora dhe Shkodra me nga 128 dhe 117 kërkesa të depozituara në gjykatë për ndarje. Gjithnjë e më shumë në dyert e gjykatave të vendit sheh çifte të rinjsh, të cilët pas vetëm pak kohësh martesë, depozitojnë në sekretaritë e tyre kërkesa për divorce, ku sipas të dhënave, rezulton se pjesa më e madhe e tyre depozitohen prej femrave.

Statistikat

Vetëm gjatë 151 ditëve të para të vitit 2010, në katër gjykatat kryesore të vendit janë depozituar plotë 847 kërkesa për divorc, ose e thënë ndryshme gati 6 kërkesa në ditë. Shifra këto alarmante deri në një farë mase, po të llogarisësh që popullsia e Shqipërisë është diçka më shumë se 3 milionë, por po të krahasosh të dhënat e këtij viti me vitet e mëpasshme, rezulton se pak a shumë është e njëjta shifër, po me një tendencë uljeje gjatë këtij viti. Në kryeqytet, gjatë 5-mujorit të parë të këtij viti janë regjistruar në gjykatë 442 kërkesa për divorc, ndërkohë që gjatë një viti më parë po në këtë periudhë shifra ishte 451. Gjithashtu në qytetin e Fierit janë regjistruar 160 kërkesa, ndërkohë që një vit më parë kjo shifër është vetëm me 5 kërkesa më e lartë. Përjashtim nuk bëjnë as Vlora e Shkodra, të cilat gjithashtu kanë vërejtur një ulje të lehtë të kërkesave për ndarje, por që gjithsesi sërish mbetet një shifër e lartë. Në bazë të statistikave të pesë viteve të fundit, numri më i madh i divorceve në këto katër qytete është regjistruar në vitin 2008, ku shënoheshin plotë 962 kërkesa për divorce. Ndërsa viti me shifrën më të ulët është ai 2006, ku regjistroheshin 740 kërkesa. Ajo që bie në sy gjatë të dhënave statistikore është fakti se Tirana, gjatë katër viteve të fundit, referuar kësaj periudhe kohore, ka shënuar gjithnjë mbi 440 kërkesa për divorce, çka nënkupton, më shumë se gjysma e të gjitha divorceve në të katërta qytetet.

Shkaqet
Në qindra dosjet që ndodhen në zyrat e gjykatave, arrin të gjesh shkaqe nga më të ndryshmet, duke nisur që nga “mospërputhja e karaktereve” e për të përfunduar deri tek “mosplotësimi i kënaqësive seksuale”. Por në bazë të të dhënave, mësohet se shkaqet kryesore të divorceve janë ato ekonomike, dhuna që ushtrohet nga bashkëshorti/ja si dhe xhelozia. Varfëria dhe papunësia janë elementet kryesore që çojnë një çift drejt divorcit. Kushtet e rënda ku jetojnë detyron njërin prej bashkëshortëve, i cili është i pakënaqur nga ajo mënyrë jetese, t’i drejtohet gjykatës për të kërkuar divorcin. Një tjetër faktor është dhe dhuna që ushtrohet kryesisht nga bashkëshortët. “Kërkoj të ndahem nga burri im, pasi ai më rreh”, - thuhet në një prej kërkesave të depozituara në gjykatë. Gjithnjë e më shumë raste të tilla janë duke u regjistruar në gjykatat e vendit. Por ka dhe nga ato bashkëshorte, të cilat duke iu frikësuar opinionit të të tjerëve, vazhdojnë të durojnë dhunën që ushtrohet ndaj tyre, duke mos bërë asnjë lëvizje për ta ndaluar atë. Lidhur me këtë shkak, ka dhe një kategori të caktuar, të cilat nuk i drejtohen gjykatës për të kërkuar divorcin si pasojë e dhunës, por kërkojnë të merren në mbrojtje nga ana e policisë, duke detyruar bashkëshortët e tyre, që për një kohë të caktuar të qëndrojnë larg saj dhe pikërisht për këtë fakt, vetëm Gjykata e Tiranës ka marrë në shqyrtim 213 kërkesa për “lëshim të urdhrave të mbrojtjes”, ku 90% e tyre janë ndaj grave, të cilat kanë denoncuar në polici dhunë që ushtrohet nga bashkëshortët e tyre. Një tjetër faktor kryesor që çon çiftet shqiptare drejt divorcit është dhe xhelozia. Kryesisht ky shkak shihet më shpesh te kërkesat që depozitohen në gjykatë nga ana e çifteve të reja, që kanë vetëm pak vite martuar. Dyshimet për tradhti nga ana e bashkëshortit respektiv detyron këto çifte që të kërkojnë divorcin. Në një prej kërkesave të shumta thuhet: “Kërkoj divorcin nga bashkëshorti im, pasi e kam kapur në shtëpi duke më tradhtuar”. Por nuk janë vetëm këto shkaqet e divorceve në Shqipëri. Konfliktet me vjehrrat, krijimi i një pavarësie ekonomike, emigrimi për një kohë të gjatë, por edhe “mentaliteti evropian” janë shkaqe që mund të gjenden me dhjetëra në zyrat e gjykatave. Ndarja e pasurisë, kujdestaria e fëmijëve si dhe pensioni janë problemet që vijnë pas kërkesës për divorc. Pjesa më e madhe e proceseve gjyqësore zvarriten për kohë të gjatë, për faktin se çiftet nuk bien dakord me njëri-tjetrin për kujdestarinë e fëmijëve, e cila shihet dhe si “trofeu” që shpall fitimtarin në këtë proces. Në shumicën e rasteve, janë nënat ato që përfitojnë kujdestarinë e fëmijëve dhe babai detyrohet që t’u paguajë çdo muaj një kuotë të caktuar, e cila shpërben për rritjen e fëmijëve. Ka raste kur të dy prindërit nuk bien dakord për fëmijët dhe përballë këtij fakti, gjykata është e detyruar të thërrasë vetë fëmijët që të vendosë se më kë prej prindërve do të qëndrojë.

E ardhmja e familjes shqiptare

Plot 1080 çifte janë ndarë gjatë vitit të shkuar në Tiranë, duke lënë qindra fëmija mes dilemës së zgjidhjes se me cilin prind duhet të jetojnë. Shifrat, të cilat për një vend evropian nuk janë aspak alarmante, tregojnë gjithnjë e më shumë se familja shqiptare është duke kaluar në një krizë për shkaqe të ndërthurura mes problemeve të shumta dhe frymës që vjen nga jashtë kufijve. Papunësia, dhuna në familje, kushtet e rënda ekonomike dhe xhelozia janë shkaqet që deklarohen më së shpeshti në kërkesat që depozitohen nëpër gjykatat e vendit.
Tirana, Fieri, Vlora dhe Shkodra shënojnë së bashku 847 kërkesa për divorce gjatë 5 muajve të para të këtij viti, duke lëshuar një sinjal që tregon se familja e shenjtë e shqiptarëve, dita-ditës është duke iu afruar mentalitetit evropian, ku divorci nuk shihet si një e keqe. Sa të përgatitur janë shqiptarët për këtë mentalitet të ri, kjo mbetet për t’u parë.

Thimi Samarxhiu Gazeta Standard

Lapsin sa do ta mprehësh dikur do të thyhet. Ata/ ato që martohetn pa laps e llogari zor se ndahen.

Sa keq....

Problemet mes cifteve jane gjithmone te pranishme, duam apo nuk duam ne  ato lindin. Kryesorja eshte te zgjidhen me mirekuptim e gjakftohtesi dhe ndarja nuk eshte zgjidhja e duhur. Ndarjen do e quaja te pranushme vetem ne rastin kur perdoret dhuna ndaj partnerit.

Thone se fajin e ka Facebook

Ti po deshe ben gili-vili edhe pa fb..lol

Nqs nje martes merr fund per shkak te fb apo cdo gje ne lidhje me virtualitet..ajo spaska qene martes.

sa keq...d.mth nenat pervec divorcit..u dashka te perballen edhe me 101 halle ekonomike