Destani: BDL nuk do t'i bojkotojë zgjedhjet lokale

Vranjë,  27 prill (presheva.com) – Kryetari i Bashkimit Demokratik të Luginës (BDL), Skender Destani ka deklaruar se subjekti i tij politik nuk do t'i bojkotojë zgjedhjet lokale.  "Nuk do t'i bojkotojmë zgjedhjet në asnjë mënyrë, qoftë edhe po qe se grupet e tjera politike vendosin t'i bojkotojnë ato", ka thënë kreu i BDL-së në një prononcim për radio "OK". Ai ka shtuar se fillimi i qershorit për zhvillimin e zgjedhjeve lokale është i hershëm, meqë në këtë rast votuesit nga bota e jashtme nuk do të mund ta shfrytëzonin të drejtën e tyre për të votuar. "Ndonëse është respektuar procedura ligjore nga ana e Kuvendit Republikan, të gjitha partitë politike shqiptare kërkojnë shtyrjen e zgjedhjeve në dobi të interesit të përgjithshëm", ka pohuar kryetari i BDL-së, Skender Destani.
   
   

Dega e LPD-së në Preshevë shndërrohet në Lëvizje Kombëtare Shqiptare

Preshevë, 29 prill (presheva.com) – Dega e Lëvizjes së Progresit Demokratik (LPD) në Preshevë është shkëputur edhe zyrtarisht të shtunën nga LPD-ja për ta themeluar një subjekt të veçantë politik. Gjatë një mbledhje të organizuar në Preshevë, dega e deritanishme e LPD-së në Preshevë ka inicuar themelimin e Lëvizjes Kombëtare Shqiptare (LKSH).

"Arsyeja themelore e nevojës së shkëputjes nga LPD-ja dhe themelimit të Lëvizjes Kombëtare Shqiptare është për shkak se dega e LPD-së në Bujanoc ka injoruar çdo mundësi bashkëpunimi dhe bashkëveprimi derisa edhe ka pranuar të kyçet në Trupin Koordinues, edhe pse kishim marrë vendim bashkërisht për mospërfshirje në të", ka qartësuar arsyen e themelimit të partisë së re politike, Orhan Rexhepi, lider i ish-degës së LPD-së në Preshevë dhe tanimë bartës i LKSH-së. LKSH-ja është partia e gjashtë politike që i tubon shqiptarët e Luginës së Preshevës.

Partia Demokratike Shqiptare kandidon Ragmi Mustafën për kryetar të Komunës së Preshevës

Preshevë, 29 prill (presheva.com) – Partia Demokratike Shqiptare (PDSH) do ta kandidojë Ragmi Mustafën për kryetar të Komunës së Preshevës në zgjedhjet lokale. "Kryesia e partisë ka vendosur që ta kandidojë Ragmi Mustafën për postin e kryetarit të Komunës së Preshevës", ka bërë të ditur të shtunën për "presheva.com" një zyrtar i lartë i PDSH-së.

Ragmi Mustafa është kryetar i Partisë Demokratike Shqiptare dhe kryetar i Kuvendit Komunal të Preshevës. Aktualisht ai e ushtron gjithashtu funksionin e ushtruesit të detyrës së kryetarit të Komunës së Preshevës, si pasojë e revokimit të kryetarit të Komunës gjatë nëntorit të vitit të kaluar. Kryetari i Kuvendit të Republikës së Serbisë, Predrag Markoviqi ka shpallur zgjedhjet për këshilltarë komunalë dhe kryetar të Komunës në Luginën e Preshevës për 4 qershor të vitit 2006. Derisa në Medvegjë dhe Bujanoc janë caktuar zgjedhje për kryetar të Komunës dhe këshilltarë komunalë; në Preshevë ato janë caktuar vetëm për kryetar të Komunës, meqë përbërja e tanishme e Kuvendit Komunal është zgjedhur më vitin 2004.

R E A G I M

lidhur me emisionin parazgjedhor të kandidatit për kryetar Komune z. Ragmi Mustafa, e që aktualisht është U.D i kryetarit të komunës dhe kryetar i Kuvendit Komunal


Në emisionin parazgjedhor të TV Presheva kandidati Ragmi Mustafa në vend që të paraqesë programin e tij zgjedhor apo eventualisht të prezantoj përparësitë që mendon se i ka në krahasim me kundër kandidatin e tij, ai edhe kësaj radhe u mor me mua, edhe pse është e njohur se PVD nuk ka paraqitur kandidat për zgjedhjet e 4 qershorit dhe nuk do të marrë pjesë në këto zgjedhje jokomplete dhe të imponuara nga pushteti serb.
Me qëllim të informimit të drejtë të opinionit lidhur me akuzat që u paraqitën në këtë emision, dua të sqaroj se ndërtimi i shkollave në Zhunicë dhe Bukuroc janë të parapar në programet investive të Komunës së Preshevës në tri vitet e fundit.
Gjatë vitit 2005 janë siguruar nga Trupi Koordinues 6.000.000,00 din. për shkollën e Bukurocës dhe 2.000.000,00 din. për shkollën e Zhunicës. Ndërsa me rebalans të Buxhetit republikan kanë qenë të parapara 12.000.000, 00 din. Për shkollën e Zhunicës dhe 8.000.000,00 din për shkollën e Bukurocës.
Meqë Programi Investiv i CHF-së për këto 2 bashkësi lokale kishte përfunduar në vitin 2004 ishte e pamundur që të sigurohet pjesmarrja e njohur e CHF-së prej 50%. Mirëpo meqë këshillat e CHF-së në Zhunicë dhe Bukuroc kanë pasur një aktivitet të dendur, strukturat e CHF-së e shprehën gatishmërinë që të ndihmojnë por me një pjesmarrje shumë më të vogël edhe ate për Zhunicë me 50.000,00 dollar dhe për Bukuroc me 10.000,00 dollarë në fazën përfundimtare kryesisht me pajisje përkatëse shkollore.
Kështuqë edhe kërkesat që ju kanë bërë Trupit Koordinues por edhe në planin financiar të tyre pjesën dërmuese të mjeteve është e paraparë ta plotësojë buxheti Republikan.
Andaj është e paqartë përse kontestohen këto dy projekte të rëndësishme nga kandidati Ragmi Mustafa e posaçërishtë është e paqartë përse nuk po fillon ndërtimi i objektit të shkollës në Bukuroc. Po aq joserioze është edhe fakti që me 6 muaj vonesë U.D i kryetarit të komunës e konteston validitetin e nënshkrimit të kontratës për ndërtimin e kësaj shkolle kur tanimë janë krejtësisht të qarta afatet ligjore për këtë çështje.



KRYETARI I PVD-së

Riza HALIMI