Dy shqiptarë në film me John Travolta dhe Denzel Washington

Hollywood-i, një tjetër film për mafien shqiptare. Në “The Taking of Pelham 1 2 3” do të luajnë edhe dy shqiptarë, të cilët mendohet të jenë të inkriminuar. Pas dy dekadash, duket se eksporti më i madh i Shqipërisë nuk janë më emigrantët, por mafiozët. Të paktën, Hollywood-i mendon kështu.

Edhe pse ka shumë shqiptarë, të cilët me punën dhe kontributin e tyre kanë përcjellë vlerat e vërteta të një kombi, aty ku jetojnë e punojnë, ajo çfarë ka mbetur më gjatë në kujtesën e të huajve nga shteti shqiptar është krimi. Nuk është hera e parë që realizohen filma me subjekt organizatat kriminale, të drejtuara nga shqiptarët, madje, Hollywood-i duket se, me realizimin e këtyre lloj filmave ka gjetur një mundësi të artë fitimi. Kjo është arsyeja që gjithmonë e më shumë shqiptarët po shfaqen nëpër filma me një status jo shumë të këndshëm, atë të mafiozëve, porse, në ndryshim me italianët apo rusët, shqiptarët përshkruhen si shumë të egër e të rrezikshëm. Regjisori i filmit, Tony Scott, ka treguar për revistën “Esquire” se, si bashkëpunëtorë të John Travoltes në film, ai zgjodhi një çift shqiptarësh, pasi nuk mundi të gjejë aktorë që t’u përshtateshin kaq mirë këtyre roleve. Shqiptarët që interpretojnë në film nuk janë aktorë profesionistë, por janë përzgjedhur nga Scott, pasi sjellin në ekran po atë figurë të dhunshme që e kanë jetuar edhe në jetën private. Por ai ka lënë të nënkuptohet se aktorët shqiptarë që ai ka përzgjedhur janë të implikuar me krimin. Ky është filmi i dytë, pas filmit “Taken”, që kryesoi në Box Office në Amerikë dhe Kanada, dhe “The Taking of Pelham 1 2 3” pritet të këtë po të njëjtin sukses. Madje, edhe zona ku është xhiruar filmi, pra lagjja “Pelham”, është vendi ku jetojnë dhe veprojnë shumë organizata të ashtuquajtura të nëntokës shqiptare. Filmi do të jepet premierë më 12 qershor dhe në rolet kryesore paraqiten John Travolta, Denzel Washington, James Gandolfini etj. Ndërkaq, aktorët shqiptarë që do të luajnë në këtë film janë Viktor Gjocaj, që luan në rolin e Bashkimit, dhe Robert Vataj, në rolin e Emrisë.

Një film britanik. Një dramë tjetër televizive për mafien shqiptare është edhe ajo angleze; një personazh tjetër shqiptar në rolin e një mafiozi, duke e nxirë edhe më shumë emrin e atyre që e quajnë veten shqiptar. “The Fixer” (“Sekseri”) është emri i teledramës më të re televizive, me disa episode, e shfaqur në stacionin televiziv ITV në Angli. Filmi është bazuar në ngjarje reale, të ndodhura në Londër, ku në qendër të saj është një shqiptar i përfshirë në prostitucion dhe që tregtonte drogë. Emri i personazhit shqiptar quhet Tarek Sokoli. Lenny, një personazh tjetër i botës së krimit, është një bos britanik krimi. Ky film tregon ngjarje mjaft të dhunshme, të cilat jo vetëm që kanë tronditur shqiptarët që jetojnë në Londër, por i kanë shtuar edhe më shumë vlerat negative të kombit tonë. Edhe në këtë film, ashtu si në atë ku luan John Travolta, shqiptarët shfaqen shumë të dhunshëm e të rrezikshëm.