Ingrid Gjoni

Pas ndarjes vendos: Single deri në 5 shtator

Po përjeton periudhën më intensive të jetës së saj. Por pa asnjë mashkull në krah. Në fakt koha nuk ja premton këtë gjë. Koncertet verore sa në një qytet në tjetrin mbushin këto ditë vere për Ingridin Gjonin, ndërkohë që ajo po i kushtohet më shumë se kurrë vetes. Ka rënë 5 kilogram falë një diete që po mban dhe vrapit që bën gati çdo ditë. Ndihet vërtetë në formë dhe duket se për momentin një mashkull në jetën e saj do të ishte i tepërt. "Këtë kohë po kujdesem për veten time. Kam nisur vrapin dhe dietën dhe ndihem më në formë se kurrë", shprehet eksluzivisht këngëtarja, që menjëherë është nisur për në Durrës, ku ishte e ftuar për të kënduar në pub "Miami Beach". E më pas për të udhëtuar në qytete të tjera, ku e presin të tjera koncerte.

ZËRAT
Ingrid Gjoni jo më larg se tre javë më parë do të mbushte faqet e shtypit rozë për ndarjen e saj nga i fejuari i saj. Lidhja e saj me të, mjaft e bujshme për faktin se ajo ishte një këngëtare e famshme dhe Enea ishte një njeri krejtësisht i panjohur shkaktoi vërtet zhurmë atë kohë. Ndërkohë që ndarjen vetë Ingridi e bëri të ditur për faktin se kishte një mospërputhje
karakteresh mes tyre. Po ndërsa tashmë secili jeton jetën e vet, zërat rreth tyre vazhdojnë të zhurmojnë. Versione nga më të ndryshme për ndarjen, motive nga më absurdet, që kur këngëtarja Gjoni i ka dëgjuar është shokuar tej mase. "E vërteta e ndarjes sonë ka qenë se ne kishim mjaft mosmarrëveshje, grindeshim dhe erdhi fundi. Nuk ishte asnjë person tjetër që prishi këtë lidhje", tregon Ingridi duke zbardhur sërish të vërtetën dhe duke mohuar çdo zë të rremë. "Unë e kam dashur Enean, por gjërat mes nesh mbaruan për arsye të tjera. Ai u bë i njohur nga unë. Dhe ne u ndamë se gjërat nuk po funksionin. Kjo është e gjitha".

Pas ndarjes vendos: Single deri në 5 shtator

"Këtë kohë po kujdesem për veten time. Kam nisur vrapin e dietën dhe ndihem më në formë se kurrë"

INGRIDI XHELOZE?!
Në kohën, që Ingridi do të publikonte ndarjen me të fejuarin e saj për shkak të mospërputhjeve të karaktereve të tyre, Enea do të reagonte menjëherë. "Ishte xheloze. Dhe kjo ishte arsyeja që e lashë", do të shprehej ai. Por vetë këngëtarja mjaft tërheqëse do ta mohonte, pasi ajo asnjëherë nuk kishte qenë xheloze për të, aq më tepër kur ajo kishte vëmendjen e gjithë meshkujve, kur kalonte jo vetëm me shoqe, por edhe kur ishte në krah të Eneas. Dhe vendimi i ndarjes kishte qenë tërësisht i saji. Zënkat dhe debatet, që ishin bërë të shpeshta kohët e fundit mes tyre ishin arsyeja e vërtetë, që sollën ndarjen e çiftit.

SINGËLL
"Po më shkon më së miri jeta singëll. Jam e lumtur se po shijoj këtë kohë të bukur të kësaj stine jo vetëm mes
publikut, që më duartroket në koncerte, por edhe me miqtë e mi. Dhe madje kam kohë për veten time më
shumë se kurrë", shprehet Ingridi e cila duket se u ka thënë 'stop' meshkujve për momentin. E në fakt të gjithë do të pyesnim për sa kohë do ta shohim vetëm Ingridin, një femër mjaft e bukur dhe seksi, një këngëtare e suksesshme dhe nga më të kërkuarat sot… Besojmë se jo shumë në fakt. Se të gjithë pas këtij lajmi, që ajo është vetëm do të vërshonin drejt saj. Por?! Por duhet të presin deri në shtator, ama…

KONCERTET
Ndërsa e ka nisur turin veror, qysh në muajin maj Ingridi duket se nuk i ka provuar gjatë pushimet këtë
verë. Koncerte që kanë qenë të shumtë në Durrës, Sarandë, Vlorë, etj. Ndërsa sot është nisur për në qytetin e luleve të Përmetit, ku do të ketë një koncert në mbrëmje. Më pas do të jetë në Sarandë, në Borsh, etj e për të kapërcyer edhe kufijtë në Zvicër, apo edhe në Greqi, ku do të ketë një tur koncertesh tre ditor atje. "Deri më 5 shtator jam thuajse çdo ditë në koncerte, kështu që nuk kam kohë për asnjë mashkull (qesh). Madje nuk kam kohë as për familjen time, me mamanë flas vetëm në telefon ngaqë jam gjithmonë në lëvizje", tregon gjithë sinqeritet ajo. Kjo do të thotë, që deri më 5 shtator Ingridi nuk do të ketë kohë për asnjë mashkull?! Gjithsesi për më pas nuk kemi një përgjigje, sepse çdo mashkull do të dëshironte të ishte në krah të saj.

KUJDESI PËR VETEN
Është mjaft në formë. Po shijon jetën e saj singëll, me impenjime që kanë të bëjnë jo vetëm me muzikën, por
edhe me kujdesin e madh që po i kushton këto kohë vetes. Dietë, vrap dhe rezultati disa kilogram më pak,
që e kanë sjellë sërish në linjat e dikurshme. Së bashku me mikeshën e saj këngëtaren Çiljeta Xhilaga janë sot dy këngëtaret më të kërkuara në koncertet, që kanë marrë pjesë dhe që do të vazhdojnë gjatë gjithë verës. Kanë përfunduar këto ditë së bashku një këngë duet, e cila shumë shpejt do të shoqërohet edhe me një klip, e që do të mund ta shohim të gjithë nëpër ekranet e televizioneve.

HISTORIA QË LA PAS

Lidhja me Enean tani e tutje është diçka që i përket së kaluarës. Një histori, që ishte e bukur për aq kohë sa zgjati dhe kaq. Arsyet, që ajo ka shpjeguar ishin një motiv i fortë për t'i dhënë fund dhe tashmë gjithë secili po jeton jetën e vet. Ndërkohë që Ingridi është vetëm, rreth ish të fejuarit të saj, Enas qarkullojnë fjalë se ai është lidhur një muaj pas ndarjes nga këngëtarja e njohur më një vajzë adoleshente, e cila thuhet se është një balerinë. Megjithatë tashmë Enea me cilëndo vajzë që do të jetë në krah do të shihet gjithmonë si ish i fejuari i Ingrid Gjonit, e cila edhe e bëri të njohur atë për aq kohë sa ishin së bashku.

INGRID GJONI, në pritje
të dy kompeticioneve

Është në prag të dy evenimenteve të mëdha muzikore që realizohen në vend: Mikrofoni i Artë dhe Kënga Magjike të cilat e kanë ngarkuar së tepërmi duke mos i lënë shumë kohë të lirë. Ingrid Gjoni prej ditësh po merret me përgatitjet e duhura qoftë për këngën por edhe për anën e koreografisë të cilën si gjithmonë e ka cilësuar si një pjesë të veçantë të interpretimit të saj. Nuk dihen shumë detajet rreth këngëve përkatëse pasi vetë këngëtarja nuk dëshiron të zbulojë shumë rreth tyre. Ajo që mësojmë është se kënga e festivalit të “Këngës Magjike” është nën kujdesin e kompozitorit Adrian Hila. Në pritje të konkurimit tek to si dhe impenjimit me disa koncerte të tjera në Europë, Ingridi ka shumë pak kohë për t’u kushtuar miqve, me të cilët del zakonisht vetëm fundjavave. “Nuk është se jam vajzë që nuk kam qejf të dal mbrëmjeve, por nuk mundem, jam e zënë dhe puna nuk më lejon të zbavitem shumë.”- thotë ajo, ndërsa pasi e pyesim se si vazhdon jeta e saj private, në mënyrë shumë të prerë ajo të përgjigjet: “Jam singël dhe vetëm kaq”. Nga sa vihet re, ashtu si edhe e motra e saj Inisi, edhe Ingridit i dallohen disa kile të humbura. Për këtë ajo vetë pohon se ka disa kilogramë më pak ndërsa tregon se Inisi është më e vullnetshme dhe i nënshtrohet në mënyrë intensive palestrës.

Ingrit Gjoni pëlqen “Vitamina”?

Nuk dimë, nëse është preferenca e Ingrit Gjonit për vitaminat, apo ky argument ka qenë i preferuar për autorin e tekstit, por mësojmë se shumë shpejt Ingriti do të prezantojë këngën “Vitamina”. Bëhet fjalë për një këngë, që tashmë është regjistruar dhe shumë shpejt do të shoqërohet nga një videoklip për t’u prezantuar në kanalet muzikore shqiptare. Do të jetë një këngë ritmike, por me një stil të veçantë dhe ndryshe nga sa jemi mësuar ta shohim Ingritin zakonisht. Po kështu duket se këngëtarja po mendon seriozisht edhe për klipin, të cilit nuk do t’i mungojnë as skenat sensuale. Njëkohësisht mësojmë se shumë shpejt, në ekrane pritet të jetë edhe videoklipi i këngës “Puçi, Puçi” një bashkëpunim i Ingrit Gjonit me Çiljetën. E ndërsa vazhdon të shfaqet në ekrane, apo edhe në ambiente publike në shoqërinë e miqve të ndryshëm dhe në formë të shkëlqyer duket se për momentin nuk kemi asnjë lajm të ri në lidhje me jetën private të këngëtares. Sa për imazhin e saj? Mund të themi, që kohët e fundit, gjithmonë e më tepër ka filluar të pëlqejë kaçurrelat.