nuk më ka pëlqyer shum
me shum motra vet irma
por këngën e fundit qe ka ber  kjo eranda* te ndjej* omg
ma hoqi petllen
shumm keng e bukur

Mmmm ka zërin e ëmbël qe sja arrin asnjera  

Eranda LIbohova Nuk kam qenë ndonjëherë pa të dashur

Pas një periudhe mungese, Eranda rikthehet me dinamizëm dhe ide të reja

Dikur ka kënduar se ishte betuar beqare. Por në fakt kjo është vetëm për në skenë. Sepse në të vërtetë Eranda Libohovës nuk i pëlqen aspak ky term dhe për më tepër, ajo ka qenë dhe vazhdon të jetë e dashuruar. Kaq mjafton për të thënë: “Nuk kam qenë ndonjëherë single”. Larg muzikës komerciale që ka nisur të krijohet dhe të lançohet dendur në Shqipëri, duket se për një periudhë të gjatë kohe Eranda Libohova iu është larguar skenave dhe festivaleve në vend. Megjithatë si një këngëtare me karrierë të gjatë dhe zë të spikatur, ajo nuk i ka munguar asnjëherë publikut, përmes aktiviteteve të ndryshme muzikore. Pas një periudhe të konsiderueshme heshtjeje, që pasoi daljet e saj të përjavshme në krah të emrave të njohur të skenës shqiptare gjatë edicionit “100 këngët e shekullit” Eranda rikthehet në skenë. Dalja e saj më e afërt do të jetë në mbrëmjen gala që do të zhvillohet më 13 dhjetor me rastin e 45-vjetorit të festivalit të Këngës në Radiotelevizion, për të vazhduar më pas me një tjetër program në Tv Klan. Njëkohësisht është duke punuar për albumin e saj, që mendohet të jetë në treg në fillim të vitit të ardhshëm.
Cilat janë impenjimet e tua aktuale. Me çfarë je duke u marrë?
Në fakt kam një axhendë të ngjeshur sepse po vazhdoj me intensitet të përgatitem për albumin tim të ri... kështu që vazhdojnë kontaktet me bashkëpunëtorët e këtij albumi, kompozitorët dhe orkestruesit, Adrian Hila, Bledar Skënderi, Flori Mumajesi, Endri Ssina, Edison Miso, Kristi dhe shumë shpejt do të filloj punën në studio për të incizuar …Në fakt albumi më ka bllokuar dhe nuk kam pasur ndonjë aktivitet koncertal të ethshëm, megjithatë shumë shpejt do të jem prezente në një projekt në Tv Klan me “Promotor”, që do të fillojë shumë shpejt, por më parë do të marr pjesë në Galanë e Festivalit që po organizon Radio Televizioni shqiptar me rastin e 45-vjetorit të këtij evenimenti... Megjithatë koncertet nuk kanë munguar, mes të cilëve do të rendisja një në Itali, Kosovë, por edhe qytete të Shqipërisë…
Cila është arsyeja që Erandën nuk po e shohim në skenat e festivaleve shqiptare. Mos ka vendosur të heqë dorë?
Përsa i përket pjesëmarrjes në Festivale, është një zgjedhje e imja që të mos marr pjesë në këto aktivitete, pa një arsye të përcaktuar, thjesht për t’i lejuar vetes më shumë hapësirë, për bashkëpunime më të gjëra. Deri diku Festivali të kushtëzon duke të ofruar një bashkëpunim të vetëm me një autor dhe kjo duke të impenjuar tre-katër muaj për një gjë të vetme. Eshtë një eksperiment që ndoshta edhe riskon, ndërsa një album përmbledh një produkt bashkëpunimesh, eksperienca me autorë të ndryshëm... Një punë e shtrirë në kohë, që ke mundësi ta pjekësh, ta diskutosh me kolegë, të tërhiqesh nëse nuk të pëlqen.. Ndërsa Festivali është “NJE MOMENT” – produkti i 3-4 muajve pune që mbaron në 3 minuta.
Çfarë mund të na zbulosh rreth pjesëmarrjes tënde në mbrëmjen Gala me rastin e përvjetorit të festivalit dhe si e gjen veten aty?
Pjesëmarrja ime në Gala me rastin e 45-vjetorit të Festivalit është pas një ftese të drejtorit artistik të Festivalit, Edmond Zhulali. Do të jetë një mbrëmje nostalgjie ku do të kalojnë në skenë personazhe të njohur të këtij eventi që nga viti 1962 kur është zhvilluar për herë të parë, deri në vitet 90. Edhe unë kam jo pak, por rreth 10 pjesëmarrje në Festival. Nuk do të interpretojmë këngët që kemi kënduar dikur, por do të këndojmë këngë që kanë mbetur në historinë e tij..p.sh unë isha mes këngëve të Gazmend Mullahit, Ilir Dangëllisë, Aleksandër Lalos..Nuk po e zbuloj se cilën vendosëm për ta prezantuar në këtë mbrëmje.
Dikur të kemi parë në duete me motrën tënde Irmën, tani këto bashkëpunime sikur janë zbehur ...
Me Irmën kam kënduar dhe vazhdoj të këndoj, e kështu do jetë gjithmonë. Prezantimi i fundit ka qenë në “100 këngët e shekullit” vitin e kaluar me “Hidhni vallen vasha të reja”, një single tjetër jemi në proces duke e përgatitur, ndërsa dalje në publik në koncerte, festa etj., kemi pothuajse çdo muaj. Këtu përfshihen këngë të repertorit tonë, por edhe qindra këngë të interpretuesve tanë kolegë të këngës... Në koncertet jashtë kufijve jemi gjithmonë bashkë..aaa harrova, Irma nuk më merr me vete vetëm kur shkon në ShBA sepse unë kam fobinë e avionit hahaha...
Ç’mund të na thuash për jetën tënde jashtë skenës... Vazhdon ta kesh qenin tënd Teo. Po miqtë e tu, janë po ata apo ka edhe hyrje të reja?
Jeta ime jashtë skenës është axhenda e një vajzë normale të kryeqytetit, që përveç impenjimeve familjare, preferon shopping në butiket e modës së fundit, ndonjë kafe, drekë me Rovenën (Dilon) ose Monikën (Lubonjën), Holtën (gazetaren) në baret e preferuara...pa harruar miqtë e vjetër dhe natyrisht njërën nga mbesat, Evën, që e konsideroj si shoqe, mbesa tjetër, Ina, që ndodhet në Spanjë më mungon, megjithëse më shkruan shpesh... Po ajo shprehja si është? Miqtë e vjetër mos i harro se të rinjtë i gjen kudo... Miqtë e vjetër janë si vera e vjetër, por janë të shumtë edhe miqtë e rinj që kam bërë këto kohë, veçanërisht njerëz, që më lidh puna e koncertet. Teon, pastorin tim e kam prej gati 10 vjetësh, tani është në moshën delikate të pleqërisë...kanë filluar problemet që kanë kafshët në këtë periudhë të jetës, duhet më shumë kujdes dhe dashuri, e cila nuk i mungon si nga unë, ashtu dhe nga prindërit e mi...Ka vetëm një armike në shtëpi, që është Megi, macja e Irmës...
Do të vazhdojmë ta shohim beqare Erandën apo ka ndonjë të re nga fusha e ndjenjave? Beqaria për ty deri tani, ka qenë fat apo një zgjedhje e menduar?
(Do ta shohim “single”). Njerëzit mbase kujtojnë këngën “Beqare jam betu”… vetëm në këngë jam betuar unë, në realitet nuk kam qenë ndonjëherë “single”. Varet sesi interpretohet ky nocion. Unë jam e dashuruar, kam qenë e dashuruar dhe kjo për mua do të thotë gjithçka – d.m.th të mos jesh “single”. Për mendimin tim nocioni “beqare” s’është as fat, as zgjedhje e menduar. Thjesht është një term që i përket folkloristikës... do hyjmë në Komunitetin Evropian apo jo?
Ka ndonjë gjë për të cilën Eranda është penduar në jetë?
Pendesa të vogla ka shumë në jetë, që lidhen me rrethana të caktuara. Pendesë është edhe, që e bëra murin e jashtëm të shtëpisë me tulla dhe nuk e lashë me kangjella p.sh...(qesh) Ndonjë pendesë të madhe në jetë nuk kam dhe ndonjë fajtor nuk mund te bëj...

G.Panorama

Eranda Libohova, nuse në Pallatin e Brigadave

Nuk e ka pasur të vështirë të hyjë edhe në një zonë të ndaluar për të tjerët.



Pikërisht në Pallatin e Brigadave, këngëtarja Eranda Libohova ka veshur fustanin e nusërisë. Një fustan gri, i qëndisur me fije të arta dhe i zbukuruar me lule të së njëjtës ngjyrë. Por jo për t’u martuar. Ajo ka shfrytëzuar gjelbërimin dhe ambientin e pakrahasueshëm të rezidencës presidenciale për të realizuar një pjesë të xhirimeve të videoklipit të saj të ri. Bëhet fjalë për klipin e këngës “Ti më harro”, që pritet shumë shpejt të jetë në ekranin e “BBF”. Një baladë dashurie, që do ta sjellë Erandën në një imazh krejt të ri, edhe pse këngëtarja me sukses ka kënduar disa herë në këtë zhanër. Është një kompozim i Adrian Hilës me tekst të Rozana Radit, që duket se do të jetë shumë premtues me zërin e Eranda Libohovës. “Përveçse unë e ndiej, që është një këngë e bukur edhe performanca ime është ndryshe”, shprehet këngëtarja duke iu referuar klipit, që pritet të dalë së shpejti. Në imazhin e saj, Eranda i ka besuar grimit të Edmond Lakos dhe veshjeve të stilistes Anila Zajmi, e cila më shumë se ideja e nuses ka dashur ta kthejë këngëtaren shumë vite pas. E për të sjellë këtë ide, ajo ka zgjedhur fustanin e gjatë të cilit në stilin e një fustani nusërie dhe i ka dhënë ngjyrën gri. Përveç skenave të realizuara në Pallatin e Brigadave, këngëtarja ka xhiruar edhe në studiot e “Max production” si dhe në një prej lokaleve të kryeqytetit “Greta Garbo”, që njihet për stilin e tij klasik. E pyetur për veshjet, që ka përdorur në këtë klip Eranda shprehet se të treja janë zgjedhur të tilla, që t’iu përshtaten skenave të xhirimit, por edhe natyrës së këngës. Kështu, që nuk do të shohim imazhe sensuale dhe skena provokuese, të cilat në fakt nuk janë pjesë e stilit të Erandës. “Fustani i zgjedhur në këtë rast i përshtatet mjaft mirë, si një kthim në kohë statujës rreth së cilës unë interpretoj”, tregon ajo. Nga skenat e klipit, por edhe natyra e këngës pritet që këtë radhë të shohim diçka krejt ndryshe nga “Choco e cacao”, kënga e fundit, që Eranda Libohova ka prezantuar me një videoklip. A do të jetë vallë një klip komercial, për të shitur më shumë albumin, që këngëtarja nxorri disa muaj më parë? “Ky klip nuk është komercial, pasi dhe kënga nuk është e tillë. Mua më pëlqen të pres që edhe publiku ta vlerësojë”, përfundon ajo.

ERANDA LIBOHOVA

Marrë nga PanoramaPlus