Tri mësueset falsifikuan 1197 dëftesa pjekurie

CERRIK – Janë 1197 dëftesa që janë falsifikuar nga tri mësueset e ndaluara dy ditë më parë në Cërrik. Burime nga Prokuroria e Elbasanit bëjnë të ditur se, në regjistrin themeltar të shkollës së mesme “Tomorr Sinani” janë grisur 23 fletë me emrat e 1197 nxënësve. Dyshohet se këto emra janë zëvendësuar me të tjerë, për t'u pajisur me dëftesa false. Për këtë janë akuzuar drejtoresha e kësaj shkolle, që është njëkohësisht edhe bashkëshortja e kryebashkiakut të Cërrikut, Kastriot Belshi. Si të implikuara po hetohen për këtë ngjarje edhe dy mësueset e kësaj shkolle, Flutura Domi dhe Ardiana Elezi.
Akuza
Burime të Prokurorisë së Elbasanit bënë të ditur se, për këtë qëllim është ngritur një grup hetimor, i cili po punon për grumbullimin e të dhënave. Deri tani është zbuluar se në regjistrin themeltar të shkollës janë zbuluar 23 fletë të grisura. Në këto fletë të grisura kanë qenë të shënuar rreth 1197 emra nxënësish. Sipas prokurorisë dyshohet se, këto emra janë zëvendësuar me të tjerë për t'i pajisur me dëftesa false. Të njëjtat burime pohojnë se, po shqyrtohen një sërë dokumentesh të marra nga shkolla e mesme. Ndërsa po punohet për të vërtetuar se cilët janë personat që u është dhënë kjo dëftesë dhe se për çfarë është përdorur.

Artan LEKA  Marrë nga Tiranaobserver