Fillon aventura "Big Brother"

Nisi mbrëmë në "Top Media" reality-show më i famshëm në botë, nën prezantimin e së njohurës Arbana Osmani

Mbrëmë në "Top Channel", DigitAlb e DigitAlb Mobile, nisi reality-show i famshëm, "Big Brother", drejtuar nga prezantuesja e njohur, Arbana Osmani. Formati që serviret është ai origjinali që gëzon një famë të jashtëzakonshme në botë, qysh nga fillimet e tij në vitet ‘90 në Holandë. Në "Top Media", ai vjen me asistencë të kompanisë "Endemol" që ka të drejtat e këtij reality-show, ndërkohë që patenta për realizimin e tij është blerë nga "Top Channel". Mbrëmë u ul perdja dhe u shua misteri i pjesëmarrësve. Ata janë 14 gjithsej, 7 femra e 7 meshkuj që variojnë nga 20 deri në 45 vjeç. Ditë pas dite e javë pas jave, ata do të bëhen të njohur për publikun deri në imtësi e pa dyshim që me temperamentin dhe formimin e tyre, do jenë pjesë e një spektakli që do të zgjasë 99 ditë. Në gati tre muaj, ata do të sprovohen në shumë forma, ku më kryesorja është ballafaqimi dhe jeta me njëri-tjetrin. Do ketë miqësi, aleanca, afinitete, por dhe përplasje, antipatia, kundërshti e mospërputhje. Duke llogaritur që të gjithë do merren me njëri-tjetrin në mungesë të televizorit, celularit, librit e deri dhe orës së dorës, "burgu" që do të krijohet do t‘i shndërrojë ata në heronj ose viktima. Dhe këtë, do ta përcaktojnë ata me njëri-tjetrin, ose do të ketë dhe prej atyre që e do zgjedhin me vullnet (për të qenë viktimë), duke u larguar vetë nga shtëpia. Lloji i këtij reality-show i përmban të gjitha ekstremitetet. Në thelb, "Big Brother", është një laborator psikologjik ku në fund ajo që kërkohet të dihet apo të njihet për çdo konkurrues, është koeficienti i lartë i vitalitetit ku përfshihet durimi, aftësia komunikuese; për të folur ose heshtur, për të përballuar provokime ose për t‘u bërë i dashur për të gjithë. Është pra një lloj minijete që konturohet brenda disa hapësirave të ngushta dhe ku me hir e pahir të ofrohet një fat, mbi të cilin duhet të ngadhënjesh. Në rastin konkret për të fituar 50 mijë euro, që është çmimi i vënë për atë që do të mbetet i fundit në shtëpi. Ambientet e "Big Brother" janë rreth 20m metra katrorë dhe në to ka një soxhorno, banja, disa dhoma dhe një kopsht. Llogaritet që kostoja e organizimit të "Big Brother Albania" në bashkëpunim mes Top Media e kompanisë së njohur "Endemol", të ketë shkruar në rreth 2 milion euro. Sipas organizatorëve, standardet e realizimit janë më të lartat pa asnjë diferencë më ato që aplikohen në disa vende të botës për reality-shoë-n në fjalë.

Pjesëmarrësit e atyshëm janë përzgjedhur nga katër audicione, në mes të mbi 2 mijë e 500 aplikantëve nga Shqipëria, Kosova, Maqedonia e disa vende të Evropës ku ka shqiptarë. Janë zgjedhur duke parë tek ata karakteristikat e veçanta dhe shprehitë e ndryshme.

Çdo të shtunë në mbrëmje, nga ora 20.45 e deri në orën 23.30, në një spektakël të drejtuar nga Arbana Osmani, siç publiku e ndoqi mbrëmë, do të eliminohet nga një konkurrent. Votimi për ta do të jetë me sms nga publiku, pasi dy prej tyre të jenë nominuar për t‘u larguar nga shtëpia nga deklarimet e njëri-tjetrit në mënyrë të fshehtë.

E gjithë jeta e atyshme për 99 ditë e net me radhë, do të jetë e vëzhguar nga 60 telekamera. Ndërsa transmetimi do të realizohet me anë të dy regjive. Nga pikëpamja e teknologjisë së realizimit dhe transmetimit, gjithçka i përket fjalës së fundit, thonë organizatorët.

Sakaq, publiku mund ta ndjekë "Big Brother" në dy kanale në DigitAlb e DigitAlb Mobile, si dhe në "Top Channel" çdo ditë nga ora 17.55 e deri në orën 18.05, ku do të serviret për publikun një ekstrat i zhvillimeve ditore.

Reality-shoë "Big Brother", konsiderohet si ndër më të suksesshmit në botë me një shikueshmëri rekord. Në Shqipëri atë e sjell për herë të parë "Top Media". Në këtë mënyrë, kjo kompani shënon një tjetër arritje të madhe në fushën e produksioneve televizive dhe spektakleve.

Të dhëna

Cmimi i parë i "Big Brother Albania", është 50 mijë euro

Kostoja e organizimit të këtij reality-show mes Top Medias e kompanisë "Endemol", ka shkuar në rreth 2 milion euro

Ambientet e "Big Brother Albania", janë rreth 2 mijë metra katrorë

Standartet e teknologjisë audiovizuale të realizimit dhe transmetimit, janë të fjalës së fundit

Janë 60 telekamera që rrokin ccdo aspekt të lëvizjeve brenda nga ana e konkurrentëve, të lidhura me dy regji.

G.Shqip

Big Brother Albania - Permbledhje - Dita 1

http://youtube.com/watch?v=5OfJUnMl7D4

Big Brother Albania - Dita 3 - Banoret kercejne

http://youtube.com/watch?v=lNovnlQi8gE

"Big Brother Albania", bien maskat, nis nominimi

Nisi mbrëmë nominimi i emrave për t‘u larguar nga shtëpia. Për një javë publiku do të vendosë me anë të sms-ve se kush do t‘i mbledhë plaçkat të shtunën e ardhshme

Mund të thuhet se "Big Brother", ai që ngërthen, provokon, nxeh, nervozon, godet, fton, largon, emocionin, pra "Big Brother" si nerv, nisi pikërisht mbrëmë. Pyetja e parë që u bëri konkurrentëve drejtuesja e spektaklit, Arban Osmani ishte: "Si ndiheni pas një jave aty?". Më pas, mes saj dhe çdokujt prej tyre nisi një dialog që kishte të bënte me ndodhitë më pikante të javës. Arbana bëri fillimisht dhe një provokim, i cili u çoi të dridhurat. "Ju - tha ajo duke iu drejtuar konkurrentëve, - jeni bërë më të famshmit në Shqipëri e kudo ku ka shqiptarë, për një javë, por sonte njëri prej jush duhet ta lërë shtëpinë". Pas kësaj fjalie, te konkurrentët u shfaq menjëherë ajo që quhet ndryshe si "prishje qejfi": kush e shprehu me pasthirrma, kush duke mbetur pa fjalë, dikujt duke iu ngrirë buzëqeshja, por pas një topitjeje, Arbana u tha se ishte thjesht një shaka. "Big Brother" si "Big", filloi që mbrëmë, kur të gjithë një e nga një, shkuan në dhomën e fshehtë dhe nisën të rrëfehen një e nga një. Filluan t‘i thonë ato çka objektivat e kamerave nuk e rrokin dot; atë që fshihet në gjokse e në mendje te çdokush për njëri-tjetrin. Nisi njohja e imtësishme për secilin, nëpërmjet fjalëve të secilit dhe opinioneve të ndërsjella. Nisën të konturohen qartë simpatitë dhe antipatitë, afinitetet dhe alergjitë, parapëlqimet dhe paragjykimet. Hipokrizia nisi të gjunjëzohet dhe të dalë në shesh e vërteta; ajo njerëzore, e cila gjithnjë ka një maskë që duhet çjerrë. Kjo nisi mbrëmë, kur filluan dhe nominimet. Te dhoma e fshehtë, filluan të përmenden emrat e atyre që duhet të ikin, të dalin nga shtëpia, për një mijë arsye, ose pa asnjë arsye. Ky është "Big Brother". Ndërsa në studion e madhe të spektaklit, aty nga drejtonte Arbana, nisi beteja tjetër: ajo mes familjarëve dhe të afërmve. Nga ç‘u pa, javë pas jave, kjo betejë që sapo ka nisur, do ta shtojë spektaklin. Tashmë, fjalën e kanë sms-të e publikut. Emrat e dominuar për t‘u larguar do të votohen dhe, të shtunën jepet verdikti për atë që duhet të mbledhë plaçkat.


Ç‘ndodhi javën e parë

Kush do të jetë i pari që do të lërë pas pragun e shtëpisë më të përfolur shqiptare? Përgjigjja e kësaj pyetje do të mund të prodhojë një tjetër seri ngjarjesh mes 14 banorëve. A do të mbizotërojë dashuria, argëtimi apo intriga? Kushdo që ka filluar të jetojë jetën e banorëve përmes ekranit mund të bëjë dhe parashikimet e sakta.

Najada, vajza fierake me tatuazhe ka arritur të fitojë pa shumë mund simpatinë e meshkujve. Ajo zgjodhi Olsin për të këmbyer përvojën e masazhit dhe në të njëjtën kohë u kthye në më të shigjetuarën e vajzave dhe zbuluesen e karakterit të djemve. Në bisedat mes banorëve e quan shok të mirë dhe ndër të vetmit që mund t‘i shkojë fjala më mirë mes banorëve.

Simpatia e çlirët mes të dyve i ka dhuruar dhe kundërshtaren e parë: Inën, e cila sa herë fillon të komentojë me ndonjë nga banorët sjelljen e "noçes"(emri me të cilin e thërrasin pjesa më e madhe, e di se çfarë do të thotë: "Nuk e duroj dot", apo "E kam shumë inat".

Sfilata e së premtes e vajzave të veshura me të zeza identifikoi grupin e parë të rivaleve. Ingridi, Juna, Julinda, Ina dhe Besarta zgjodhën të "zbukuroheshin" pa pasur vërdallë Najadën dhe Rominën. Kur Arbri u bë kurioz për këtë ndarje, përgjigjja që mori nga Juna ishte: "Kaq janë femra. Pjesa tjetër janë meshkuj".

Po kaq mjaftoi për të nxjerrë anën tjetër të këngëtares bukuroshe. Shënjestra e Junës u bë Astriti. Pas shumë debatesh me të mbi origjinën dhe mënyrën e tij të jetesës, situata i del jashtë kontrollit te sfilata në kopsht. Të dy bashkë nuk ranë dakord për mënyrën sesi do të ecnin në pasarelën e improvizuar të shtëpisë. Kaq mjaftoi që Titi të rifitonte nofkën "katunar".

Një nofkë që banorët e tjerë do ta shfrytëzonin për mirë një ditë para spektaklit, kur Shkëlqimi hodhi idenë për të përgatitur pilafin (meqë ai ia kishte marrë dorën në lokalin e vet në fshatin Kllojkë) dhe Arbri e Julinda gjetën tek ai shpëtimtarin e zjarrit, provës sfilitëse të javës.

Mbajtja e flakës gjallë shkëmbeu çiftet dhe u tregoi banorëve se të jetosh në shtëpinë e "Big Brother" nuk ishte aq e lehtë sa e kishin menduar. Ata duhet të mos flenë, të durojnë të ftohtin ditën dhe natën, të rrinë me ndonjë pasi sapo kanë bërë sherr. Të gjitha këto për të siguruar më shumë të ardhura për javën në vazhdim.

Këtë javë ia "hodhën" dhe shpenzimet do të rriten me 50 për qind më shumë se një javë më parë. Megjithëse në fund të javës së parë rrezikuan të mbetnin pa ushqime, kur në spektakël u pyetën se cili ishte ushqimi i preferuar përgjigjja "live" ishte cigaret.

Por prova e zjarrit tregoi më mirë se kush shkon mirë me kë e kush do ta ketë të vështirë të integrohet mes banorëve.

Shkëlqimi, ish-polici 38-vjeçar zbuti tonet e hoqi të folurën urdhëruese me banorët e tjerë më të vegjël në moshë. Leonardi, bojaxhiu i tërhequr (dhe një nga të stresuarit e mungesës së cigareve) shpesh e quante "psikologu i shtëpisë". Por ditët e fundit të javës Çimi e pranoi para banorëve se e kishte nisur gabim jetën në shtëpi, ndaj në ditët të vazhdim ai do të ishte më i zbutur. Ky është një lajm i mirë për Rominën, por pak rëndësi ka për Ingridin, gruan e divorcuar dhe nënën e dy vajzave.

Nga gjithë banorët e tjerë (pa përfshirë grupin e aleancës Juna- Julinda- Besarta) ajo perceptohet si e stresuar dhe e fiksuar pas idesë se "kush përpiqet t‘i ofrojë miqësi, pa diskutim këtë e bën për të mos iu përmendur emri në dhomën e rrëfimeve si një nga kandidaturat që duhet votuar për të dalë jashtë shtëpisë.

Djali me të cilin i ecën më shumë biseda është Poli. Ky bashkë me Arbrin dhe Ervisin formon grupin e djemve të mirë të shtëpisë që deri tani kanë zgjedhur për të qëndruar më të rezervuar, duke ia lënë javëve në vazhdim sensin e protagonizmit. Sens që javën e parë e zotëruan Shkëlqimi, Najada dhe Olsi.

Gazeta Shqip

Big Brother Albania - Dita 8-Diskutimi mbi dashurine e Arbrit

http://www.youtube.com/watch?v=_lxW1Q6P5sM

Të gjithë kundër Ingridit

Pas nominimit, jetesa për Ingridin brenda mureve të shtëpisë së madhe të "Big Brother"-it bëhet edhe më e vështirë. Çimi dhe Titi akuzojnë Ingridin se nuk është vetvetja dhe përpiqet që të bëjë të tjerët të ndihen në faj. Gjithçka ka nisur si debat në një tryezë, ku kanë qenë të pranishëm edhe Nardi me Junën. Më tej, Ingridi ka nisur sulmet ndaj Çimit, e ndërsa fjalori mes tyre ka qenë ai i fyerjeve të ndërsjella. I vetmi që e ka mbështetur disi Ingridin ka qenë Leonardi, i cili është përpjekur edhe ta qetësojë disi situatën. Ingridi është bërë gjithashtu objekti i thashethemeve në gojën e shumicës së banorëve të shtëpisë së madhe të "Big Brother"-it, duke lënë të kuptohet se presin që ajo duhet të jetë e nominuara, që duhet të lërë shtëpinë këtë javë.
Këtë mund ta shihnin lehtë të gjithë natën e spektaklit, kur të nominuarit kanë pasur dikë pranë, e ndërsa Ingridi dukej se nuk ekzistonte për ta. E vendosur në shënjestër të të gjithëve Ingridi është parë edhe e vetme ta mbyllë provën e javës pikturën për të cilën duhet të punonin të bashkuar. Idetë e përcjella nga Ingridi për tablonë nuk janë përkrahur nga pjesëtarët e tjerë të grupit, me të cilin ajo duhej të punonte. Ndryshe nga Ingridi, 2 banorët e tjerë të nominuar, Romina dhe Shkëlqimi, po e presin më me qetësi të shtunën kur do të jepet edhe rezultati i televotimit për personin që do të lërë shtëpinë e madhe të "Big Brother"-it.

Olsi dhe Najada
Sytë e miliona atyre që ndjekin "Big Brother"-in kanë qenë sërish të fokusuar në ndjekje të lëvizjeve të Olsit dhe Nadës në të njëjtin shtrat. Këtë herë gjithçka është dukur se diçka mes tyre duhej të ndodhte, pasi Nada mbante në trup vetëm një rrobdëshan. Olsi thërret Nadën dhe pas masazhit, që tashmë është bërë zakon mes tyre, nata i gjen sërish së bashku. Olsi i kërkon Najadës t‘i qëndrojë asaj çfarë tha Arbana gjatë spektaklit dhe të nisin nga të vërtetat
Ka pasur ledhatime sigurisht, por për sytë kureshtarë i sigurojmë se asgjë nuk ka ndodhur mes tyre. Olsi është përpjekur të bëjë xheloze Najadën për Junën, duke thënë se do të donte të dinte nga Juna nëse kishte dëshirë të bënte masazh. Frika e një refuzimi nga ana e Junës, duket se po e tremb Olsin t‘i afrohet asaj, edhe pse duket se shfaq interes. Najada ka ditur të shfaqet indiferente ndaj këtij diskutimi, por Olsi justifikohet duke thënë se po pyeste për Titin, pasi, sipas tij, është Titi ai që kërkon nga Juna një masazh. Edhe Olsi nuk ka munguar në bisedat e Junës.Juna i shprehet Nardit se po habitej me Olsin, pasi, sipas saj, ai nuk i fliste qysh nga nata e spektaklit. Juna i tregon Nardit se nuk e dinte arsyen, e ndërsa shprehet e bindur se nuk do t‘i flasë deri sa ai t‘i flasë i pari. Ndërkohë, në një bisedë me Polin, Olsi shpreh një dëshirë të çmendur për të dehur Junën, por nuk shpjegon motivin.

***

Pas një debati të gjatë dyjavor, më në fund banorët ndajnë turnet për punët e shtëpisë. Olsi dhe Najada pastruan shtëpinë, e ndërsa Besarta dhe Astriti gatuan. Besarta i ka kënaqur të gjithë me tavën dhe ëmbëlsirën që ajo kishte përgatitur, e ndërsa Astriti këtë herë ka shërbyer si një kamerier i mirë.

Gazeta Shqip

ku esht diferenca ke kafazi art dhe big brother?