Shoqata e ish-të përndjekurve politikë kërkon heqjen e simboleve komuniste

Mozaiku i Muzeut, simbol i diktaturës

Shoqata e ish-të burgosurve politikë ka kërkuar dje përmes një deklarate për shtyp heqjen e simboleve komuniste nga të gjitha objektet publike në vend. Sipas kësaj shoqate heqja e simboleve komuniste është në të njëjtën kohë edhe një kërkesë e paraqitur nga Këshilli i Evropës. Në këtë kontekst, kjo shoqatë deklaron se mbështet nismën për heqjen e mozaikut në Muezun Kombëtar, në qendër të kryeqytetit."Ashtu si gjithë populli ynë që rrëzoi komunizmin bashkë me monumentet e diktarorëve edhe ne i vuajtëm në shpinën tonë vuajtet e atij sistemi.P ërshëndesim dhe përkrahim nismën e historianëve dhe mendimtarëve përparimtarë për heqjen e mozaikut-simbol të komunizmit nga qendra e kryeqytetit tonë", bëhet e ditur në deklaratën për shtyp të shoqatës së ish-të përndjekurve politikë. Gjithashtu, kjo shoqatë e konsideron mozaikun në fjalë si një kujtim të hidhur të një periudhe të errët dhe shkatërrimtare për kombin shqiptar. "Komunizmi shkaktoi vëllavrasjen, e varfëroi materialisht dhe shpirtërisht popullin tonë, e izoloi nga bota e qytetëruar, e largoi nga Europa dhe e ktheu rrotën e historisë gjysmë shekulli para" thuhet më tej në deklaratë. Sipas kësaj shoqate, pamja që mozaiku mbart nuk tregon dhe paqyron gje tjetër veçse simbolin e sistemit komunist. "Shikojeni atë mozaik, ku shhaqet një turmë e çoroditur, që i ka kthyer shpinën perëndimit dhe shkon drejt 'Lindjes së Kuqe' me pushkë ndër duar dhe me simbolin e komunizmit, yllin e kuq në kapele dhe në flamur. Ku venë, vallë ata njerëz-robotë, ata 'revolucionarë të revoltuar' ? Mos ndoshta, shkojnë tek bunkerët 'për të mbrojtur atdheun nga armiqtë e brendshëm dhe të jashtëm, nga imperialzmi amerikan dhe borgjezia europiane'?" thuhet më tej në deklaratë. Në këtë kontekst shoqata e ish të burgosurve politikë e cilëson si absurd faktin që ky mozaik të vazhdojë dhe të qëndrojë në qendër të kryeqytetit. "Është e qartë se nostalgjikët e së kaluarës, veteranë, të krimeve komuniste, me të cilët përzihet dhe ndonjë person i çekuilibruar mendërisht, do të dëshironin ta shikonin aty pranë dhe monumentin e dikurshëm të diktatorit Hoxha, apo pak më tej edhe të Stalinit dhe të Leninit". Së fundmi, ish- të burgosurit politikë shprehen se së shpejti do të zbatohet premtimi për ngritjen e një memoriali për qëndresën e popullit shqiptar kundër komunizmit, në vendin ku dikur ngrihej shtatorja e Enver Hoxhës.

RD