Shumë sipërmarrës kanë marrë iniciativën për të hapur një biznes të ri.

Sipas të dhënave zyrtare, gjatë vitit 2006 është konstatuar një rritje e shpejtë e ndërmarrjeve të reja të krijuara rishtazi, e përkatësisht me 14.372 subjekte të reja, nga të cilat 108 biznese janë me kapital tërësisht të huaj apo të përbashkët. Referuar të dhënave të INSTAT-it, numri i subjekteve aktive deri në fund të vitit 2006 arriti në 77.814, nga të cilat 974 janë kompani me kapital të huaj. "Koeficienti i lindshmërisë për vitin 2006 është 18% me një rritje ndaj atij të vitit 2005, që ishte 15%", citohet në programin ekonomik. Ndërkohë që për sa i takon shpërndarjes gjeografike të bizneseve në Shqipëri, rreth 51% e ndërmarrjeve aktive janë përqendruar në prefekturat e Tiranës dhe Durrësit, ku janë punësuar 57% e të punësuarve të sektorit privat. Shpërndarja e SME-ve sipas sektorëve të ekonomisë janë, tregtia me 49%, shërbimet me 26%, industria me 10% dhe transporti me 9%. Në sektorët e tregtisë dhe shërbimeve ku operojnë 75% e bizneseve janë të punësuar 45.2% e të punësuarve të sektorit privat.

G.Panorama