Raporti parashikon një ngadalësim të rritjes së GDP-së në ekonomitë europiane. Vetëm Shqipëria, Hungaria dhe Turqia bëjnë përjashtim

BB: Shqipëria, rritje ekonomike edhe për 2008


Banka Botërore publikoi dje raportin e perspektivës e rritjes globale të ekonomisë për vitin 2008, në të cilin vlerëson se Shqipëria do të ketë një rritje ekonomike 6% gjatë vitit 2008 dhe 6.2% gjatë vitit 2009. Banka Botërore parashikon një ngadalësim të rritjes së GDP-së në ekonomitë europiane, duke theksuar se vetëm Shqipëria, Hungaria dhe Turqia bëjnë përjashtim, ekonomitë e të cilave ndryshe nga ato të vendeve të tjera do të vazhdojnë të rriten edhe përgjatë 2008. "Në Shqipëri, rritja ekonomike do të vazhdojë të mbështetet në kërkesën e shumtë të brendshme, duke përfshirë edhe një rritje në investimet publike. Këto investime janë shumë të rëndësishme për kapërcimin e problemeve thelbësore në infrastrukturë, ndërsa kufizimet e energjisë përbëjnë një pengesë për rritjen ekonomike", thekson raporti në vlerësimet e tij për Shqipërinë. Në vendet e tjera të Europës, kërkesa e brendshme pritet të ulet në mënyrë të lehtë nga rritja e fortë e kohëve të fundit, nga kontributi i konsumit privat dhe rënia e investimeve me 0.2% në 2008. Sipas raportit, përjashtim nga ky trend përbëjnë vetëm Shqipëria, Hungaria dhe Turqia. Raporti vijon më tej, duke theksuar se në Hungari dhe Turqi, lehtësimi i mëtejshëm i politikave monetare pritet të rrisë kërkesën e brendshme, duke çuar në një rritje ekonomike. Raporti vlerëson se ekonomia botërore do të ketë një rritje më të ulët gjatë 2008 për shkak të paqëndrueshmërisë financiare të shkaktuar në Shtetet e Bashkuara nga kriza e kredive, çmimi i lartë i energjisë dhe ndryshueshmëria e kursit. Forcimi i kushteve të kredisë ndërkombëtare dhe dobësimi i kërkesës së jashtme, rënia e rritjes ekonomike pritet të përfshijë të gjithë rajonin e Europës Juglindore. Në disa vende inflacioni është rritur, për shkak të kërkesës së lartë të brendshme dhe rritja e çmimit të ushqimeve dhe karburanteve e përkeqësuan situatën ekonomike në Bullgari dhe Rumani. Shenja të mbinxehjes po vihen re në Bullgari dhe vendet Balltike. Raporti vlerëson se, rritja ekonomike pësoi rënie nga 6.9% në 6.7% nga viti 2006 në vitin 2007 në Europë dhe Azinë Qendrore, duke reflektuar kërkesën e brendshme dhe të jashtme. Me një popullsi të qëndrueshme, kjo nënkupton se prodhimi për frymë vazhdoi të rritet me më shumë se 6%. Prodhimi i lartë u mundësua nga teknologjia e lartë, dyshifrimi i rritjes së investimeve i mbështetur nga zgjerimi i shpejtë i kredive nga bankat vendase dhe të huaja, rritja e çmimit të energjisë për eksportuesit e hidrokarbureve dhe të ardhurat nga emigrantët. Këto faktorë ndikuan në rritjen e konsumit privat dhe rritën në mënyrë të qëndrueshme 3% ose më shumë importet mbi eksportet. Këto zhvillime, të cilat ndikuan në rritjen e shpejtë të standardeve të jetësës, kishin edhe koston e tyre. Qarkullimi i kapitalit ka krijuar sfida për menaxhimin makroekonomik: pasi inflacioni mbetet i lartë krahasuar me zonën e Euros, duke e bërë më të vështirë për disa vende të ruajnë kurse këmbimi të favorshme dhe defiçiti i disa vendeve importuese të naftës është rritur. Në shkallë nënrajonale, rritja ekonomike në Europën Qendrore dhe Lindore, ka shënuar një rënie në 6.0% për vitin 2007 nga 6.5% që ishte në vitin 2006, e ardhur si pasojë e rritjes së shpejtë të kredive dhe pagave reale, qarkullimit të lartë të kapitalit dhe hyrjes së madhe të të ardhurave nga emigracioni.

RD