Llojet e rrezikuara te faunes

Në kodrat e Kavajës (Kalaja e Turrës), vihet re përveç përdorimit të gjetheve edhe prerja e drurëve të dafinës e përdorimi i tyre për dru zjarri. Si rrjedhojë pylli i dafinës në këto kodra është rralluar shumë dhe rrallë mund të shihet ndonjë dru më i lartë se 2 m. Kështu po zhduket gradualisht një nga pyjet e rrallë të Mesdheut dhe vetëm zbatimi për një kohë të gjatë (rreth 10-15 vjet) i masave të rrepta të ruajtjes mund ta shpëtojë këtë pyll e ta kthejë në gjendjen e mëparshme.

Kritike paraqitet gjendja lidhur me dëmet që po i shkaktohen florës spontane nga grumbullimi intensiv i bimëve mjekësore (Shqipëria zë vendin e dytë në Evropë për eksportimin e bimëve mjekësore). Grumbullimi jo sipas modaliteteve tekniko-shkencore dhe mungesa e një qëndrimi të ndërgjegjeshëm nga ana e mbledhësve privatë ka shkaktuar rrallimin e specieve të tilla si: Siderites raeseri (çaji i malit), në Llogara, Tomor, çajup; Salvia officinalis (sherebela), në malin e Shëngjinit e të Rencit; Satureja montana (trumza), në malin e Krujës e të Sarisatllëkut. Origanum vulgaris (rigoni), në zonën bregdetare ku vërehet dëmtimi i llojit për shkak të grumbullimit masiv e pa kriter të tij vitet e fundit. Drejt zhdukjes janë llojet të ndryshme të gjinisë Orchis (salepi) dhe Fucus virsoides (algë) e cila tashmë është zhdukur në Treport ku gjendet edhe kufiri jugor i arealit të saj.

Fauna detare

Studime për peshqit e rrezikuar janë kryer nga Instituti i Kërkimeve të Peshkimit në Durrës në bashkëpunim me MEDITS të Bashkimit Evropian. Të dhënat krahasuese të nxjerra për vitet 1996, 1997 dhe 1998 japin indekset e abondancës (kg/km2 dhe N/km2) të specieve të ndryshme. Llojet kryesore për të cilat jepen të dhëna për rrezikshmërinë e zhdukjes dhe për nivelet e ulëta të zënies janë:

Merluccius merluccius (merluc);
Micromesistius poutassou (merluc tripendësh);
Mullus barbatus (barbun);
Spicara flexuosa (maridhe);
Trachurus mediterraneus (stavride mesdhetare);
Trisopterus minutus capelanus (peshk lakuriq);
Parapenaeus longirostris (karkalec detit);
Loligo vulgaris (kalamar);
· Sepia officinalis (sepie), nuk u has asnjë ekzemplar gjatë të trija fushatave.

Në 1998 është vërejtur një ulje e abondancës për llojet Merluccius merluccius, Eledone cirrhosa, Spicara flexuosa dhe Helicolenus dactylopterus, ndërsa ka një rritje për Parapenaeus longirostris, Mullus barbatus dhe për gjininë Trachurus, për të cilët gjatë 1997 kundrejt 1996 ka pasur rënie të ndjeshme.

Gjithashtu kritike është edhe gjendja e disa specieve të krustaceve për të cilat jepen nivele alarmante të pakësimit.

Për tipin Annelides, duhet theksuar lloji Hirudo medicinalis (shushunja mjekësore) që aktualisht përfshihet në kategorinë e rrezikimit LR (nt).

Tipi Mollusca: Sot raportohen për 4 klasa të tipit Mollusca, 17 rende, 104 familje dhe 520 lloje. Duhet theksuar se taksonet, duke filluar nga gjinia e me tej familje, rende e klasa kanë përfaqësuesit e vet në të dy mjediset kryesore të jetesës.