Rreth dy muaj pas vrasjes së agjentit italian Nicola Calipari në Irak, qeveria italiane paraqiti një raport vetjak

Më pak se dy muaj pas vrasjes së agjentit të fshehtë italian, Nicola Calipari në Irak, qeveria italiane paraqiti një raport të sajin për këtë rast. Në të autoritetet italiane arrijnë në përfundime të tjera nga ato të ushtrisë amerikane. Pika e kontrollit në të cilën u vra Calipari në fillim të marsit në Bagdad nuk mund të dallohej që larg, thuhet në raport. Ushtria amerikane ka qenë shumë mirë e informuar për udhëtimin e autokolonës me gazetaren e liruar italiane, Xhuliana Sgrena drejt aeroportit. Tensioni, mungesa e përvojës dhe stresi tek ushtarët amerikanë shkaktuan fatkeqësinë, theksohet në raport. Forcat e armatosura amerikane i shpallën krejtësisht të pafajshëm ushtarët. Ministria e jashtme amerikane tha se në raportet nga Roma dhe Uashingtoni ka shumë pika të përbashketa dhe se marrëdhëniet bilaterale vazhdojnë të jenë të shkëlqyeshme.